Qostanaı oblysynda qańyrap turǵan ǵımarattarǵa qatysty jańa talap qoıyldy
ASTANA. KAZINFORM — Qostanaı oblysynda tozyǵy jetken, qaraýsyz qalǵan jáne ıesiz ǵımarattar máselesin sheshý jumystary jedeldetilmek. Ár nysan boıynsha naqty merzim men is-qımyl jospary belgilenip, sharalardy ýaqtyly qabyldamaǵany úshin jeke jaýapkershilik júkteledi, dep habarlaıdy Kazinform tilshisi.
Bul másele «Taza Qazaqstan» respýblıkalyq ekologııalyq baǵdarlamasyn iske asyrýǵa arnalǵan keńeste talqylandy. Jıynda uzaq ýaqyt boıy qaraýsyz qalyp, tıisti kútim jasalmaǵan nysandarǵa erekshe nazar aýdaryldy. Jergilikti atqarýshy organdarǵa mundaı ǵımarattardy anyqtaý jáne qajetti qujattardy rásimdeý jumystaryn jedeldetý tapsyryldy.
— Zańǵa sáıkes, ıesiz ǵımarat aldymen esepke qoıylýy kerek. Eger bir jyl ishinde onyń ıesi tabylmasa, qujattar sotqa joldanýǵa tıis. Bul rette jergilikti bılik máseleni sheshýdi sozbalańǵa salmaýy qajet. Al qaraýsyz qalǵan ǵımarattyń ıesi bolsa, onymen baılanysyp, nysandy retke keltirý talap etiledi. Zańdy negizder bolǵan jaǵdaıda ǵımarat apatty dep tanylyp, buzylýy múmkin, — delingen habarlamada.
Ár nysan boıynsha qandaı shara qabyldanatyny jáne onyń merzimi naqty belgilenedi. Jumysty sozǵany úshin jaýapty tulǵalardyń jeke jaýapkershiligi qarastyrylady, ıaǵnı jergilikti bılikke qaraýsyz qalǵan ǵımarattardy anyqtap qana qoımaı, árqaısysyna qatysty naqty shara qabyldaý mindeti júkteldi.
Buǵan deıin Qonaevta áıel Almaty oblystyq sotynyń ǵımaratynyń esigin syndyrǵany úshin jazaǵa tartylǵanyn jazǵanbyz.
