Qostanaı oblysynda KamAZ-ben soqtyǵysqan mototsıklshi qaza tapty
ASTANA. KAZINFORM — Qostanaı oblysynda QAZ-19 avtojolynda, Semıletka aýylynyń mańynda adam ólimimen aıaqtalǵan jol-kólik oqıǵasy boldy, dep habarlaıdy Kazinform tilshisi.
Oqıǵanyń mán-jaıyn Qostanaı oblysy polıtsııa departamenti bastyǵynyń orynbasary Amanjol Baızaqov málimdedi.
Onyń aıtýynsha, avtojolda «KamAZ» kóligi men mototsıkl soqtyǵysqan. Apat saldarynan mototsıkl júrgizýshisi aýyr jaraqat alyp, oqıǵa ornynda qaza tapqan.
— «KamAZ» júrgizýshisi manevr jasaý kezinde qaýipsizdikke kóz jetkizbeı, mototsıklmen soqtyǵysqany anyqtaldy. Jol-kólik oqıǵasy boıynsha polıtsııa tergeý jumystaryn bastady, — dedi Amanjol Baızaqov.
Polıtsııa jol qozǵalysyna qatysýshylardy jol erejesin qatań saqtaýǵa shaqyrdy.
Buǵan deıin Taldyqorǵandaǵy aınalma jolda bolǵan jol apatynan bir adam qaza taýyp, úsh adam zardap shekken bolatyn.
