Qostanaı oblysynda qalǵan 4 ardagerge qansha teńge tólenetini belgili boldy
ASTANA. KAZINFORM — Qazir óńirde 4 Ekinshi dúnıejúzilik soǵys ardageri, sondaı-aq atalǵan zańnyń qoldanylý aıasyna kiretin 3040 ardager jáne basqa da sanattaǵy azamattar turady.
Oblys ákimdigi baspasóz qyzmetiniń málimetine sáıkes, Qostanaı óńirinde QR «Ardagerler týraly» Zańyna sáıkes ardagerler men olarǵa teńestirilgen tulǵalardy áleýmettik qorǵaý boıynsha júıeli jumys jalǵasyp jatyr.
Jyl boıy ardagerler men tyl eńbekkerleri olardyń ómir súrý sapasyn arttyrýǵa jáne áleýmettik qoldaýdy kúsheıtýge baǵyttalǵan áleýmettik, ekonomıkalyq jáne mádenı is-sharalar keshenimen qamtyldy.
9 mamyr — Jeńis kúnine oraı jergilikti ókildi organdardyń sheshimderi negizinde Uly Otan soǵysynyń qatysýshylaryna 5 000 000 teńge mólsherinde birjolǵy áleýmettik kómek kórsetildi.
Qosymsha tólemder azamattardyń ózge de sanattaryna qarastyrylǵan, onyń ishinde:
- Ekinshi dúnıejúzilik soǵys kezeńinde fashıster men olardyń odaqtastary qurǵan kontslagerlerdiń,
- gettolardyń jáne basqa da májbúrli ustaý oryndarynyń kámeletke tolmaǵan tutqyndaryna;
- qorshaýdaǵy Lenıngrad qalasynda kásiporyndarda, mekemelerde jáne uıymdarda jumys istegen jáne «Lenıngradty qorǵaǵany úshin» medalimen nemese «Qorshaýdaǵy Lenıngrad turǵyny» belgisimen marapattalǵan azamattarǵa;
- Ekinshi dúnıejúzilik soǵys jyldarynda tyldaǵy janqııarlyq eńbegi jáne minsiz áskerı qyzmeti úshin burynǵy KSRO ordenderimen jáne medaldarymen marapattalǵan tulǵalarǵa, sondaı-aq 1941 jylǵy 22 maýsymnan 1945 jylǵy 9 mamyrǵa deıin keminde alty aı eńbek etken (qyzmet atqarǵan), biraq joǵaryda atalǵan marapattarǵa ıe bolmaǵan azamattarǵa;
- Ekinshi dúnıejúzilik soǵysta qaza tapqan jaýyngerlerdiń jesirlerine jáne múgedektigi bar dep tanylǵan Ekinshi dúnıejúzilik soǵys ardagerleriniń qaıtys bolǵan jubaılaryna.
Atalǵan sanattar úshin tólem mólsheri qala jáne aýdan máslıhattarynyń sheshimderimen aıqyndalady.
Birjolǵy tólemderden bólek, turaqty negizde ardagerlerge, tyl eńbekkerlerine, sondaı-aq olarǵa teńestirilgen tulǵalar men olardyń otbasy múshelerine aı saıyn áleýmettik kómek kórsetiledi.
Jergilikti ókildi organdardyń sheshimderine sáıkes, atalǵan sanattaǵy azamattar saýyqtyrý baǵytyndaǵy áleýmettik qoldaý sharalarymen de qamtylǵan.
— Oblystyq máslıhattyń sheshimine sáıkes ardagerlerge sanatorıı-kýrorttyq emdelýge tegin joldamalar beriledi. 2026 jyly oblystyq bıýdjet qarajaty esebinen 360 adamdy saýyqtyrý josparlanǵan. Budan bólek, 2024 jyldan bastap óńirde balamaly qoldaý tetigi engizildi — sanatorıı-kýrorttyq emdelýge jumsalǵan shyǵyndardy óteý. Ótemaqy áleýmettik qyzmetter portalynda belgilengen joldamanyń kepildendirilgen qunynan aspaıtyn mólsherde beriledi, — delingen habarlamada.
Osydan buryn 2026 jyldyń mamyryna qaraı elde Ekinshi dúnıejúzilik soǵystyń nebári 57 ardageri qalǵany anyqtaldy.
