Qostanaı oblysynda ınkassator 39 mln-nan astam teńge urlaǵan
QOSTANAI. KAZINFORM – Lısakovsk qalasynyń soty qyzmet babyn paıdalana otyryp, bótenniń múlkin qoldy etti dep aıyptalǵan qala turǵynyna qatysty úkim shyǵardy.
Qostanaı oblystyq soty baspasóz qyzmetiniń málimetinshe, sottalýshy Lısakov qalasy men Qostanaı–Jitiqara avtojoly boıynda ornalasqan seriktestiktiń ózin-ózi qyzmet kórsetý termınaldaryn tehnıkalyq jaǵynan qamtamasyz etetin maman bolyp jumys istegen. Ol 2022 jyldyń maýsym aıy men 2023 jyldyń qarashasyna deıin «Kassa 24» sertıfıkattalǵan tólem júıesine tirkemesten termınaldardan aqshany jınaǵan jáne qarjyny kompanııanyń kassasyna ótkizbegen.
Urlyq 20 termınaldy ınkassatsııalaý barysynda anyqtalǵan. Seriktestikke keltirilgen jalpy shyǵyn 39 mıllıon teńgeden asyp ketken.
Prokýratýra aıyptalýshyǵa ortasha qaýipsizdik deńgeıindegi túzeý mekemesinde 8 jyl bas bostandyǵynan aıyrý jazasyn jáne qosymsha sharalardy taǵaıyndaýdy surady. Sottalýshy óz kinásin tolyq moıyndady. Jábirlenýshi taraptyń ókili jaza taǵaıyndaý máselesin sottyń qaraýyna qaldyrdy.
Nátıjesinde sot ony 8 jylǵa bas bostandyǵynan aıyrý jazasyna kesti. Sondaı-aq oǵan 5 jyl boıy basshylyq jáne materıaldyq jaýapkershilik júkteletin laýazymdardy atqarýǵa tyıym salyndy. Azamattyq talap tolyq qanaǵattandyryldy.
Úkim áli zańdy kúshine engen joq.
Osyǵan deıin Qostanaı oblysynda náreste ólimi úshin bas dárigerlerge sógis jarııalanǵany týraly jazdyq.