Qostanaı oblysynda glıýten men lımon qyshqylyn óndiretin keshen salynady

ASTANA. KAZINFORM – Sıngapýrlyq XIYU AGRICULTURAL PTE LTD kompanııasynyń qatysýymen óńirde astyqty tereń óńdeýge baǵyttalǵan iri ınvestıtsııalyq joba júzege asyrylyp jatyr. Bul týraly Aýyl sharýashylyǵy mınıstrliginiń baspasóz qyzmeti habarlady. 

Úsh jylǵa josparlanǵan jobanyń ınvestıtsııalyq quny 250 mıllıon AQSh dollaryn qraıdy.

Bolashaq agroónerkásiptik keshen jylyna 300 myń tonna bıdaı, 220 myń tonna jemdik bıdaı men arpa, sondaı-aq 200 myń tonna kúnbaǵys óńdeýge eseptelgen.

Óndiris nátıjesinde 27 myń tonna glıýten, 66 myń tonna lımon qyshqyly monogıdraty jáne 61 myń tonna sýsyz lımon qyshqyly shyǵarylady.

Atalǵan joba úshin qýattylyǵy 90 myń tonna bolatyn Tobyl elevatory jáne 20 gektar jer ýchaskesi satyp alyndy. Kompanııa aýqymdy jańǵyrtý jumystaryn júrgizip, aýmaqqa kógildir otyn júıesi ornatyldy. Qondyrǵylarǵa, temirjol joldaryna kúrdeli jóndeý júrgizildi, saǵatyna 55 tonnaǵa deıin keptirý qýaty bar jańa qondyrǵy ornatyldy. Sondaı-aq tarazy jáne elektrmen jabdyqtaý júıeleri jańartylyp, ónim eksportyn qamtamasyz etetin zamanaýı konteıner alańy quryldy.

Keshen quramynda jylyna, 125 myń tonna lımon qyshqylyn, 200 myń tonna shıkizattan tazartylmaǵan kúnbaǵys maıyn, 360 myń tonna mal azyǵy unyn jáne 100 myń tonna kúkirt qyshqylyn óndiretin jeliler bolady.

Joba joǵary qosylǵan quny bar ónimderdi Taıaý Shyǵys, Eýropa, Túrkııa jáne Qytaı elderine eksporttaýǵa baǵyttalǵan.

Bul aımaqtyń eksporttyq áleýetin arttyryp, Qazaqstannyń agrarlyq sektoryna qosymsha sheteldik ınvestıtsııa tartýǵa múmkindik beredi.