Qostanaı oblysynda er adamnan 200 keliden astam esirtki tárkilendi

ASTANA. KAZINFORM – ІІM esirtki qylmysyna qarsy is-qımyl komıtetiniń qyzmetkerleri Qostanaı oblysy PD esirtki qylmysyna qarsy is-qımyl basqarmasy jáne oblys prokýratýrasymen birlesip, iri kólemdegi esirtki zattaryn tasymaldaý arnasyn toqtatty. 

Jedel-izdestirý is-sharalary barysynda Qostanaı — Áýlıekól — Surǵan avtojolynda 200 keliden astam tyıym salynǵan zatty tasymaldaǵan er adam ustaldy. Kólikti tekserý kezinde júk kóliginiń kýzovynan, temir bóshkeniń ishinen polıetılenge oralǵan qap tabyldy. Onyń ishinde ósimdik tektes zat bolǵan.

Avtokólikti muqııat tekserý barysynda polıtseıler arnaıy jabdyqtalǵan jasyryn oryndy anyqtady. Jasyryn bólikte skotchpen oralǵan, ózine tán ıisi bar ósimdik tektes zat salynǵan 20 qap bolǵan.

Atalǵan fakti boıynsha qylmystyq is qozǵaldy.

Kúdikti ustalyp, ýaqytsha ustaý ızolıatoryna qamaldy. Qazirgi ýaqytta sotqa deıingi tergep-tekserý júrgizilip jatyr. Barlyq mán-jaı men esirtki zattaryn jetkizý arnalary anyqtalyp jatyr. 

Aıta ketelik Almatyda esirtki plantatsııasyn uıymdastyrǵan eki kúdikti ustaldy.