Qostanaı oblysynda eki depýtat sot zalynda qamaýǵa alyndy
QOSTANAI. KAZINFORM – Qostanaı qalalyq sotynda Beıimbet Maılın aýdany máslıhatynyń depýtattaryna qatysty sybaılas jemqorlyqpen baılanysty is qaraldy.
Sot 2024 jyldyń tamyzy men qazany aralyǵynda júrgizilgen memlekettik aýdıttiń jergilikti JShS-nyń birinen memlekettik satyp alý kezinde mólsheri 38,77 mln teńgeni quraıtyn zańbuzýshylyqtar anyqtaǵanyn kórsetti. Depýtattardyń biri departament ókilderine isti toqtatý úshin 2 mln teńge para usynǵan. Ekinshi depýtat aqshany berý kezinde ustaldy.
Prokýror olardy 2 jyl 7 aı jáne 1,5 jylǵa bas bostandyǵynan aıyryp, memlekettik qyzmetke ómir boıy kele almaıtyn etýdi surady. Aıypkerler ózderiniń kinásin moıyndap, is qysqartylǵan tártipte qaraldy.
Sot olardyń birin 1 jyl 6 aıǵa, ekinshisin 2 jyl 7 aıǵa sottady. Ekeýi de memlekettik qyzmetke ómir boıy kele almaıdy.
Olar sot zalynda qamaýǵa alyndy. Úkim kúshine engen joq.
Osyǵan deıin Qostanaı oblysynda máslıhat tóraǵasy 2 mln teńge para berdi degen kúdikke ilingeni týraly jazdyq.