Qostanaı oblysynda brýtsellez juqtyrǵan maldy soıýǵa jiberýden bas tartqan sharýa qojalyǵy sotqa tartyldy
QOSTANAI. KAZINFORM - Qostanaı oblystyq soty baspasóz qyzmetiniń habarlaýynsha, zańbuzýshylyq Denısov aýdanynda anyqtalǵan. Zerthanalyq zertteýler sharýa qojalyqtarynyń birine tıesili iri qara maldan brýtsellez aýrýyn anyqtaǵan.
Zertteý nátıjelerin alǵannan keıin veterınarııalyq-sanıtarııalyq ınspektor aýrý maldy sanıtarııalyq soıýǵa jiberý, sondaı-aq mal ustalǵan qora-jaılardy tazartý týraly nusqama bergen.
Alaıda belgilengen merzimde sharýa qojalyǵy bul talaptardy oryndamaǵan. Osyǵan baılanysty Veterınarııalyq baqylaý jáne qadaǵalaý komıtetiniń Denısov aýdandyq aýmaqtyq ınspektsııasy sotqa júgingen.
Sot talqylaýy barysynda aýrý juqtyrǵan maldy ustaý veterınarııalyq-sanıtarııalyq qaýipsizdikke qater tóndiretini anyqtaldy. Sonymen qatar jaýapker zerthanalyq zertteý nátıjelerin joqqa shyǵaratyn nemese nusqamanyń oryndalǵanyn rastaıtyn dálelder usynbaǵan.
Qostanaı oblysynyń mamandandyrylǵan aýdanaralyq ekonomıkalyq soty talap aryzdy tolyq qanaǵattandyrdy. Sot sharýa qojalyǵyna brýtsellez juqtyrǵan maldy sanıtarııalyq soıýǵa jiberýdi jáne qora-jaılardy sanıtarııalyq tazartýdy mindettedi.
Sot sheshimi ázirge zańdy kúshine engen joq.
Aıta keteıik, Aqtóbede bıyl eki myńnan astam iri qara maldan brýtsellez anyqtaldy.
