Qostanaı oblysynda bıylǵy qys qandaı bolady? Sınoptıkter boljamy

ASTANA. KAZINFORM — Qostanaı oblysynda 2026–2027 jylǵy qys birshama jyly bolady dep kútilgenimen, aýa temperatýrasy kúrt qubylýy múmkin. Sınoptıkter boran, qatty jel, kóktaıǵaq pen tuman bolatynyn boljaıdy. Bul týraly Kazinform tilshisi habarlaıdy.

shıshkı, zıma, pogoda, aýa raıy, qys
Foto: Aǵybaı Aıapbergenov / Kazinform

Maýsymdyq konsýltatıvtik boljamǵa sáıkes, aldaǵy qys salystyrmaly túrde jyly ári jaýyn-shashyn mólsheri qalypty deńgeıde bolady. Degenmen maýsym boıy kúnniń jylynýy sýyq aýa raıymen almasyp, temperatýra jıi qubylýy múmkin.

Mundaı ózgerister qar jamylǵysynyń betinde muz qabatynyń paıda bolýyna ákelýi yqtımal. Sonymen qatar oblystyń keı jerlerinde boran soǵyp, jel kúsheıedi, kóktaıǵaq pen tuman bolady dep boljanyp otyr.

Jeltoqsan

Jeltoqsanda aýanyń ortasha temperatýrasy klımattyq normadan 2 gradýsqa joǵary bolady dep kútiledi. Al jaýyn-shashyn mólsheri osy aıǵa tán qalypty deńgeıde boljanyp otyr. Jeltoqsan aıyna arnalǵan tolyq boljamdy myna jerden oqýǵa bolady.

Qańtar

2027 jylǵy qańtarda Qostanaı oblysynyń basym bóliginde aýanyń ortasha temperatýrasy klımattyq norma shamasynda bolady. Ádette óńirde qańtardyń ortasha temperatýrasy -14…-16,3 gradýs aralyǵynda. Jaýyn-shashyn mólsheri de qalypty deńgeıde kútiledi. Qańtar aıynyń normasy – 10-23 mıllımetr.

Aqpan

Qystyń sońǵy aıy da ádettegiden birshama jyly bolady dep boljanyp otyr. Oblystyń basym bóliginde aýanyń ortasha temperatýrasy klımattyq normadan 1-3 gradýsqa joǵary bolýy múmkin. Al óńirdiń soltústiginde aıtarlyqtaı aýytqý kútilmeıdi.

Aqpan aıyndaǵy klımattyq norma -13,3…-15,3 gradýs aralyǵynda. Oblystyń basym bóliginde jaýyn-shashyn mólsheri qalypty deńgeıde, ıaǵnı 8-22 mıllımetr shamasynda bolady. Degenmen óńirdiń soltústik-shyǵysynda jaýyn-shashyn ádettegiden kóbirek túsýi múmkin.

Qys salystyrmaly túrde jyly bolǵanymen, sınoptıkter aýa temperatýrasynyń kúrt ózgerýinen, borannan, kóktaıǵaqtan jáne qar jamylǵysynyń betinde muz qabatynyń paıda bolýynan saq bolýdy eskertedi.

Buǵan deıin habarlanǵandaı, 18 qarashada eldiń birneshe óńirinde qar jaýyp, ekpini kúshti jel soǵady.