«Qostanaı oblysynda balyq qyryldy»: mamandar tekseris júrgizedi
QOSTANAI. KAZINFORM – Qostanaı oblysy Jangeldın aýdany Torǵaı ózeninde balyq qyrylǵany týraly áleýmettik jelilerde taraǵan habarlamalardan keıin Ekologııa jáne tabıǵı resýrstar mınıstrligi oqıǵanyń sebebin anyqtaý jáne tergeý úshin komıssııa jiberip jatyr.
QR Ekologııa jáne tabıǵı resýrstar mınıstrligi osy oqıǵaǵa baılanysty 2026 jyldyń 12 qańtarynda Jangeldın aýdanyna issapar josparlanǵanyn habarlady. Quramynda Sanıtarlyq-epıdemıologııalyq qyzmet, Tabıǵı resýrstar departamenti, Ekologııa departamenti jáne Balyq sharýashylyǵy ınspektsııasynyń mamandary bar komıssııa qurylady.
Mınıstrlik Torǵaı ózeninde buryn osylaı balyq qyrylǵan jaǵdaı tirkelgenin atap ótti. Buǵan sýdaǵy ottegi deńgeıiniń kúrt tómendeýi sebep boldy.
– Jergilikti issapar negizinde sý jáne bıologııalyq synama alynady, qajetti zerthanalyq zertteýler júrgiziledi jáne jaǵdaıǵa resmı baǵa beriledi, - dep habarlady Ekologııa mınıstrligi.
Degenmen áleýmettik jelilerde oqıǵanyń yqtımal sebebi týraly ártúrli pikir aıtylyp jatyr. Sonyń ishinde balyq qyrylýyna radonǵa baı jer asty sýlarynyń ózenge qosylyp ketýi sebep bolýy múmkin degen boljam bar.
Degenmen qazir bul habarlama resmı túrde rastalmady.
Buǵan deıin, 2025 jyldyń sáýirinde Qostanaı oblysynyń Jangeldın aýdany Tatyr ózeninde balyq qyrylǵan oqıǵa tirkelgen.
Soltústik Qazaqstan oblysy Aqqaıyń aýdany Aralaǵash aýylynyń mańyndaǵy kanal ólgen balyqqa tolǵanyn jazǵan edik.