Qostanaı oblysynda áıeli men balasyn óltirgen er adam ómir boıyna sottaldy
ASTANA. KAZINFORM – Qostanaı oblysynda áıeli men kámeletke tolmaǵan ulyn óltirgen er adam ómir boıyna bas bostandyǵynan aıyryldy. Bul týraly oblystyq sottyń baspasóz qyzmeti málim etti, dep habarlaıdy Kazinform agenttiginiń tilshisi.
Apellıatsııalyq shaǵym qaralǵannan keıin sot úkimi ózgerissiz qalyp, zańdy kúshine endi.
Qaıǵyly oqıǵa 2025 jylǵy 29 qyrkúıekke qaraǵan túni Áýlıekól aýdanynda bolǵan. Іs materıaldaryna sáıkes, er adam úıinde otyryp, jubaıyna degen qyzǵanysh pen ajyrasýǵa kelispeý saldarynan onymen aradaǵy qarym-qatynasty anyqtaýǵa sheshim qabyldaǵan. Osy maqsatta ol as úıden pyshaq alyp, áıeli jatqan bólmege barǵan.
Sol sátte olardyń kámeletke tolmaǵan uly oıanyp, ákesin toqtatýǵa tyrysqan. Alaıda er adam balaǵa birneshe ret pyshaq jaraqatyn salǵan. Balasynyń aıǵaıynan oıanǵan áıel ony qorǵaýǵa umtylǵanymen, sottalýshy oǵan da shabýyl jasaǵan. Anasy men balasy alǵan kóptegen pyshaq jaraqattynan oqıǵa ornynda qaza tapqan.
Sot talqylaýy barysynda memlekettik aıyptaýshy aıyptalýshyǵa ómir boıyna bas bostandyǵynan aıyrý jazasyn taǵaıyndaýdy surady. Al sottalýshy óz kinásin tolyq moıyndamaǵan. Onyń aıtýynsha, adam óltirý oıy bolmaǵan jáne sol sátte shok jaǵdaıynda bolǵan. Sonymen qatar jábirlenýshi taraptardyń biri sottan oǵan jeńildik jasaýdy surap, sottalǵan adamnyń óziniń ákesi bolyp qala beretinin atap ótken.
Alaıda sot jasalǵan qylmystyń asa joǵary qoǵamdyq qaýiptiligin, onyń qatygez sıpatyn jáne eki adamnyń, onyń ishinde kámeletke tolmaǵan balanyń qaza tapqanyn eskerip, er adamdy kináli dep tanydy.
Sot úkimimen ol qylmystyq-atqarý júıesiniń tótenshe qaýipsizdik mekemesinde ómir boıyna bas bostandyǵynan aıyrý jazasyna kesildi. Apellıatsııalyq saty bul úkimdi ózgerissiz qaldyrdy, osylaısha sot sheshimi zańdy kúshine endi.
Eske sala keteıik, áıel men balanyń máıiti tabylǵannan keıin kúdikti – 51 jastaǵy er adam izin sýytpaı ustalǵan edi.
