Qostanaı oblysynda áıel eki balasymen ıis tıip kóz jumdy
Qostanaı oblysyndaǵy aýyldardyń birinde anasy men eki balasy ıis tıip kóz jumdy.Kazinform bul týraly Tótenshe jaǵdaılar departamentine silteme jasap habarlaıdy.
«30 qazan kúni Fedorov aýdany, Qorjynkól aýyldyq okrýgine qarasty Lesnoe aýylyndaǵy jekemenshik úıde qatty otynmen janatyn peshti qoldaný kezinde 48 jastaǵy úı ıesi ystan ýlanyp, aýdan aýrýhanasyna jetkizildi. 39 jastaǵy áıel, 10 jáne 15 jastaǵy balalary oqıǵa ornynda kóz jumdy», - delingen baspasóz qyzmetiniń habarlamasynda.
Aldyn ala boljam boıynsha, adam ólimine peshtiń syrtqy bóligindegi sylanbaǵan sańylaýlar men shoıyn taqtadaǵy jaryqtardan ystyń úıge taralýy sebep boldy.
Qostanaı oblysynyń Tótenshe jaǵdaılar departamenti turǵyndardan órt qaýipsizdigi erejelerin qatań saqtaýyn jáne qaýip tóngen jaǵdaıda 112 nómirine habarlasýyn suraıdy.
