Qostanaı oblysynda avtomobıl shyǵaratyn Kia zaýytynyń qurylysy bastaldy
Qostanaıda Kia avtomobılderi óndirisiniń tolyq tsıklin qamtıtyn zaýyttyń qurylysy bastaldy. Qurylys jumystaryn resmı bastaý rásimine QR Premer-Mınıstriniń birinshi orynbasary Roman Sklıar jáne Qostanaı oblysynyń ákimi Qumar Aqsaqalov qatysty, dep habarlaıdy Kazinform Premer-Mınıstr saıtyna silteme jasap.
Osyndaı iri ónerkásip nysanynyń qurylysy Memleket basshysy Qasym-Jomart Toqaevtyń Ońtústik Koreıa kompanııasynyń basshylyǵymen ýaǵdalastyqtary nátıjesinde bastalyp otyr. Eske sala keteıik, osy jyldyń qańtar aıynda Prezıdent Qostanaıda Kia avtomobılderiniń shaǵyn toraptyq óndirisin iske qosý rásimine qatysa otyryp, ónerkásip kooperatsııasyn odan ári keńeıtý jáne ınjenerlik bazany qalyptastyrýdyń mańyzyn atap ótken bolatyn.
Joǵary jalaqy tólenetin 1 500 jumys ornyn qurýǵa múmkindik beretin jańa zaýyttyń óndiristik qýaty jylyna 70 myń avtokólik bolmaq. Jobaǵa shamamen $250 mln tikeleı sheteldik ınvestıtsııalar salynatyn bolady.
Roman Sklıar óz sózinde Kia kompanııasy alǵash ret Koreıa Respýblıkasynan tys jerde birlesken kásiporyn men zaýyt salýǵa tikeleı ınvestıtsııa salyp otyrǵanyn atap ótti.
«Qostanaıda KIA avtomobılderin shyǵaratyn tolyq tsıkldi zaýyt salýdy mashına jasaý salasy úshin shyn máninde serpindi joǵary tehnologııalyq joba dep ataýǵa bolady. Bul joba naqty mýltıplıkatıvti áser beredi, ınjenerlik jáne tehnıkalyq kadrlardyń jańa býynyn daıarlaý deńgeıin arttyrýǵa, sondaı-aq lokalızatsııalaýdyń kelesi kezeńine kóshýdi aıtarlyqtaı jedeldetýge múmkindik beredi», — dedi Roman Sklıar.
Premer-Mınıstrdiń birinshi orynbasarynyń aıtýynsha, osyndaı negizgi ınvestory bar zaýyttyń paıda bolýy otandyq ónerkásipti damytýdyń mańyzdy kezeńi, ekonomıkanyń barlyq salalarynda Ońtústik Koreıamen bolashaq birlesken ınvestıtsııalyq jobalar úshin aıqyn úlgi bolady.
Qurylys jumystary 2024 jyly aıaqtalady dep kútilýde, sodan keıin jabdyqtar ornatyla bastaıdy. 2025 jyldyń birinshi toqsanynda zaýyt pılottyq rejımde iske qosylmaq, al ekinshi toqsanynda óndiristiń tolyq tsıkli ashylady.
«Búginde Kia úshin Qazaqstan Respýblıkasynyń ekonomıkasyn damytýǵa úles qosý múmkindigine ıe bolý – úlken qurmet pen maqtanysh. Qostanaıdaǵy jańa zaýyt azamattar, ýnıversıtet túlekteri men ınjenerlerge joǵary deńgeıdegi tájirıbe jınaýǵa múmkindik beretin biregeı jumys oryndaryn usyna otyryp, mańyzdy ról atqaratynyna senimdimin», — dedi Kia Corporation prezıdenti jáne bas dırektory Ho Sýn Son beınehabarlamasynda.
Ońtústik Koreıa kompanııasy avtomobıl jasaýdaǵy jergilikti qamtý deńgeıin arttyrý boıynsha Qazaqstannyń ónerkásiptik saıasatyna tolyq qoldaý kórsetýge daıyn ekenin bildirdi. Kia Qostanaıda lokalızatsııalaý ortalyǵyn ashý boıynsha belsendi túrde jumys júrgizip jatyr. Munda shaǵyn jáne orta bıznestiń qatysýymen quramdas bólikter óndirisi júrgizilmek.
Oblys ákimi Qumar Aqsaqalov ozyq álemdik tájirıbelerge júgine otyryp, zamanaýı joǵary tehnologııalyq kásiporyndy iske qosý respýblıkanyń avtomobıl jasaýdaǵy óndiris kólemin ulǵaıtýǵa yqpal etetinine senimdi.
«Mashına jasaý salasyn damytý óńirdiń damýyna mýltıplıkatıvtik turǵydan áser etedi. Atap aıtqanda, mashına jasaý salasynda bir jumys ornyn qurý basqa salalarda bes-alty jumys ornynyń qurylýyna septigin tıgizedi. Óndiristerdi lokalızatsııalaý deńgeıin arttyrý úshin jańa zaýyttyń aınalasynda quramdas bólshekter jetkizýshileri retinde shaǵyn jáne orta bıznes beldeýi qurylady», — dedi Qumar Aqsaqalov.
Koreıa Respýblıkasynyń Qazaqstandaǵy elshisi Te-ık Chjo 30 jyldan astam ýaqyt boıy Qazaqstan men Ońtústik Koreıa ózara tıimdi áriptestikti nyǵaıtyp kele jatqanyn atap ótti.
«Búginde elderimiz QR Prezıdenti Qasym-Jomart Toqaevtyń Qazaqstan halqyna Joldaýynda aıtylǵan ekonomıkalyq reformalardyń maqsattaryna sáıkes keletin ekonomıkalyq yntymaqtastyqty is júzinde belsendi túrde damytýda. Bul reformalar óńdeý salasyn damytý arqyly respýblıka ónerkásibin ártaraptandyrýǵa baǵyttalǵan», — dedi ol.
