Qostanaı oblysynda aýrýhanada 10 aılyq bala kóz jumdy
ASTANA. KAZINFORM - Qaıǵyly oqıǵa bir kún buryn belgili boldy: baqılyq bolǵan balanyń anasy áleýmettik jelide Qostanaı oblystyq balalar aýrýhanasynyń juqpaly aýrýlar bólimshesinde 10 aılyq balasy qaıtys bolǵany týraly jazba qaldyrǵan. Jaǵdaıǵa oblystyq densaýlyq saqtaý basqarmasy túsinik berdi.
Áıel náresteniń ólimine dárigerlerdiń salǵyrttyǵy sebep bolǵanyn jazdy: bala aýrýhanaǵa demikpemen túsken. Anasynyń aıtýynsha, oǵan naqty dıagnoz qoıý múmkin bolmady. Bólimshede birneshe kún jatqan bala jansaqtaý bóliminde kóz jumǵan. Bul faktige Qostanaı oblysynyń densaýlyq saqtaý basqarmasy túsinik berdi.
— Densaýlyq saqtaý basqarmasy Qostanaı oblystyq balalar aýrýhanasynda kóz jumǵan balanyń týystary men jaqyndaryna qaıǵylaryna ortaqtasyp kóńil aıtady. Osy iske baılanysty densaýlyq saqtaý basqarmasynda qyzmettik tekserý bastaldy. Sondaı-aq oqıǵaǵa qatysty sot-medıtsınalyq saraptama júrgiziletinin habarlaımyz. Saraptama nátıjeleri men medıtsınalyq farmatsevtıkalyq qyzmettiń sapasy, baqylaý komıtetiniń (QQMDB) qorytyndysy usynylady, - dep habarlady vedomstvo.
Qostanaı oblysynyń polıtsııa departamenti túsinikti keıin berýge ýáde etti.
Buǵan deıin Almaty oblysynda jan túrshigerlik oqıǵa bolǵan edi. Onda qaraýsyz qalǵan ǵımarattan jańa týǵan náresteniń denesi tabyldy.
