Elimizde alǵash ret aýyl medbıkelerine 1 mln teńge kóleminde kótermeaqy tólenedi
QOSTANAI. KAZINFORM - Qostanaı oblysy aýyldyq jerge jumysqa baratyn orta medıtsına qyzmetkerlerine oblystyq bıýdjetten kótermeaqy beretin Qazaqstandaǵy alǵashqy óńir bolady. Tegin tólemniń mólsheri 1 mln teńge.
Oblystyq máslıhat depýtattary medıtsınalyq jáne farmatsevtıkalyq qyzmetkerlerge áleýmettik qoldaý kórsetý qaǵıdalaryna engiziletin ózgeristerdi qarady.
Otyrys barysynda buǵan deıin mundaı qoldaý dárigerlerge ǵana kórsetilgeni aıtyldy. Al orta medıtsına qyzmetkerlerine kótermeaqy tólenbegen.
-Buǵan deıin orta medıtsına qyzmetkerlerine mundaı qoldaý bolǵan joq. Bul – alǵash ret engizilip otyrǵan shara. Jalpy Qazaqstan boıynsha Qostanaı oblysy aýyldyq jerlerge jumysqa baratyn orta medıtsına qyzmetkerlerine kótermeaqy belgiledi, – dedi jıynda.
Aýyldyq jerge jumysqa jiberiletin orta medıtsına qyzmetkerlerine 1 mln teńge kóleminde birjolǵy tólem beriledi.
Bul sanatqa medbıkeler men farmatsevter kiredi.
Sonymen qatar dárigerlerge beriletin kótermeaqy mólsheri de qaıta qaralady.
Máslıhat otyrysynda tanystyrylǵan jobanyń sońǵy nusqasyna sáıkes, aýdandyq jáne oblystyq mańyzy bar qalalarda dárigerlerge 5 mln teńge tólenedi.
Arqalyq qalasy, Jitiqara jáne Qostanaı aýdandary úshin kótermeaqy mólsheri 7 mln teńge bolyp belgilenedi.
Oblystyq densaýlyq saqtaý basqarmasynyń basshysy Erkebulan Baıazıtovtyń aıtýynsha, ózgerister tek tólem mólsherin arttyrýdy kózdemeıdi.
Áleýmettik qoldaý alǵannan keıingi mindetti eńbek etý merzimin qysqartý josparlanyp otyr.
Sondaı-aq maman jumysyn merziminen buryn toqtatqan jaǵdaıda qarajatty qaıtarý tártibi ózgeredi.
Buǵan deıin maman alǵan qarajatyn tolyq kólemde qaıtarýy tıis bolsa, endi qaıtarylatyn soma ótelmegen jumys merzimine proportsıonaldy túrde esepteledi.
Densaýlyq saqtaý basqarmasynyń málimetinshe, 2026 jyldyń birinshi jartyjyldyǵynda kótermeaqyny jeti dáriger alǵan.
Olardyń tórteýi qalada, bireýi monoqalada, ekeýi aýyldyq jerde jumysqa ornalasqan.
Sonymen qatar asa tapshy mamandyqtar boıynsha úsh mamanǵa 53 mln teńge kóleminde tólem jasalǵan.
Kótermeaqynyń jańa mólsheri máslıhat sheshimi kúshine engennen keıin qoldanyla bastaıdy.
Osyǵan deıin SQO-da aýylǵa kelgen 58 dárigerge 87 mln teńge kótermeaqy beriletini týraly jazdyq.
