Qostanaı oblysynda aýyl sharýashylyǵynyń jalpy ónimi 1 trln teńgeden asady
ASTANA. KAZINFORM — Bıyl Qostanaı oblysynda agroónerkásiptik keshendi qoldaýǵa 207 mlrd teńge bólindi. Bul týraly óńir ákimi Qumar Aqsaqalov málim etti.
— Agroónerkásiptik keshen ekonomıkanyń negizgi salalarynyń biri bolyp qala beredi. Osy jyly agroónerkásiptik keshendi qoldaýǵa 207 mlrd teńge bólindi, bul ótken jylmen salystyrǵanda 1,2 ese kóp (170,0 mlrd teńge). Sonyń arqasynda bıylǵy 11 aıdyń qorytyndysy boıynsha aýyl sharýashylyǵynyń jalpy ónimi 924 mlrd teńgeni qurady, al jyl qorytyndysy boıynsha 1 trln teńgeden asady degen jospar bar. 7 mln tonna astyq jınaldy, — dedi Q. Aqsaqalov Ortalyq kommýnıkatsııalar qyzmetindegi baspasóz máslıhatynda.
Onyń aıtýynsha, mal sharýashylyǵy salasynda búginde oblysta 7 ónerkásiptik zamanaýı ári tsıfrlyq taýarly-sút fermasy paıdalanýǵa berildi, al 2026 jyly taǵy 5 ferma iske qosylady. Osy jobalardy iske asyrý arqyly iri sharýashylyqtarda sút óndirýdi 2 esege (75,0-den 152,0 myń tonnaǵa deıin) ulǵaıtýǵa múmkindik bolady.
— Memleket basshysy óz Joldaýynda agrarlyq sektordyń tereń óńdeý áleýetin damytý qajettigin atap ótken. Oblysta óndiriletin barlyq ónimdi qaıta óńdeýimiz kerek. Óńirde qoıylǵan mindetterdi oryndaý úshin astyqty tereń óńdeý boıynsha 1 joba iske asyrylyp jatyr, — dedi óńir ákimi.
Buǵan deıin habarlanǵandaı, Qostanaı oblysy ekonomıkasynyń barlyq salasynda oń serpin bar.
