Qostanaı oblysynda aýa raıyna baılanysty tórt jol ýchaskesinde qozǵalys shekteldi
ASTANA. KAZINFORM – Qostanaı oblysynda qar jaýyp, jel kúsheıip, kóktaıǵaq bolýyna baılanysty respýblıkalyq mańyzy bar tórt avtojol ýchaskesinde jazǵy dóńgelekpen júretin kólikterdiń qozǵalysyna shekteý engizildi, dep habarlady «QazAvtoJol» ulttyq kompanııasy.
Shekteý 18 qarasha kúni saǵat 10:00-den bastap kúshine endi.
– 2026 jylǵy 18 qarasha saǵat 10:00-de aýa raıynyń qolaısyzdyǵyna (qar, jel, kóktaıǵaq) baılanysty Qostanaı oblysynda respýblıkalyq mańyzy bar kelesi avtojoldarda jazǵy dóńgelektermen jabdyqtalǵan avtokólikterdiń barlyq túrleri úshin qozǵalysqa shekteý engizildi, – delingen kompanııa habarlamasynda.
Atap aıtqanda, qozǵalysqa shekteý myna jol ýchaskelerinde qoldanylady:
-
«Astana – Atbasar – Jaqsy – Rýzaevka – Sarykól – Qostanaı (aınalma jolymen) – RF shekarasy» avtojolynyń 418-539 shaqyrymy (Qarabalyq kenti – Qostanaı qalasy);
-
«Astana – Atbasar – Jaqsy – Rýzaevka – Sarykól – Qostanaı (aınalma jolymen) – RF shekarasy» avtojolynyń 555-685 shaqyrymy (Tobyl qalasy – Sarykól kenti);
-
«Qostanaı – Áýlıekól – Surǵan» avtojolynyń 7-108 shaqyrymy (Tobyl qalasy – Áýlıekól kenti);
-
«Qostanaı – Mamlıýtka» avtojolynyń 250-404 shaqyrymy (Uzynkól kenti – Tobyl qalasy).
Júrgizýshiler joldardyń jaı-kúıi men qozǵalysqa engizilgen shekteýler týraly qosymsha aqparatty 1403 baılanys ortalyǵyna habarlasyp, táýlik boıy ala alady.
Aıta keteıik, buǵan deıin «QazAvtoJol» ulttyq kompanııasy Qazaqstannyń 11 oblysynda, sonyń ishinde Qostanaı óńirinde qar jaýyp, joldarda kóktaıǵaq bolýy múmkin ekenin eskertken edi. Júrgizýshilerge jyldamdyqty jol jaǵdaıyna qaraı tańdap, qaýipsiz araqashyqtyqty saqtaý usynyldy.