Qostanaı oblysynda alıment qaryzy bar eki boryshker baspanasyn berdi
QOSTANAI. KAZINFORM – Qostanaı oblysynyń Qarabalyq aýdanynda alıment boıynsha 7 mln teńgege jýyq qaryzy bar eki boryshkerdiń jyljymaıtyn múlkine óndirip alý qoldanyldy.
Qarabalyq aýdany prokýratýrasynyń málimetinshe, balalardyń quqyqtary men zańdy múddelerin qorǵaý aıasynda alıment óndirý týraly sot sheshimderiniń oryndalýyna erekshe nazar aýdarylyp otyr.
Qadaǵalaý barysynda aýdan turǵyndarynyń biri alımenttik mindettemelerin uzaq ýaqyt boıy oryndamaǵany anyqtaldy. Onyń kámeletke tolmaǵan balasyna alıment boıynsha bereshegi 3,6 mln teńgeden asqan.
– Balanyń buzylǵan quqyqtaryn qalpyna keltirý maqsatynda prokýratýra atqarýshylyq is júrgizý sheńberinde tıisti sharalar qabyldady. Nátıjesinde 2026 jylǵy 6 mamyrda Qarabalyq aýdandyq soty boryshkerdiń Qarabalyq aýylynda ornalasqan turǵyn úıine óndirip alýdy qoldaný týraly uıǵarym shyǵardy, – delingen prokýratýra habarlamasynda.
Taǵy bir jaǵdaıda boryshker 2019 jyldan beri birneshe jyl boıy balasyn asyraý jónindegi mindetin oryndaýdan jaltaryp kelgen. Sonyń saldarynan alıment boıynsha bereshek 3,4 mln teńgege jetken.
Prokýratýranyń bastamasymen boryshkerdiń jyljymaıtyn múlkiniń ½ bóligine óndirip alý qoldanyldy. Qazirgi ýaqytta bereshekti óteý esebinen atalǵan páter úlesin óndirip alýshyǵa berý rásimi júrgizilip jatyr.
Osylaısha, prokýrorlyq qadaǵalaý sharalary boryshkerlerdiń múlkin sot aktilerin oryndaýǵa baǵyttaýǵa jáne balalardyń múliktik quqyqtaryn qalpyna keltirýge múmkindik bergen.
Qarabalyq aýdanynyń prokýratýrasy ata-analardyń balalaryn asyraý mindeti alımenttik mindettemeler tolyq oryndalǵanǵa deıin saqtalatynyn eske saldy.
Kámeletke tolmaǵandardyń quqyqtaryn qorǵaý, sot aktileriniń oryndalýyn qamtamasyz etý jáne boryshkerlerdiń ata-analyq mindetterin tıisinshe oryndaýyna baǵyttalǵan jumystar jalǵasady.
Aıta keteıik, Óskemende balalarǵa 1,5 mlrd teńgeden astam alıment tólenbegen.
