Qostanaı oblysynda ákesi men qyzy Tobyl ózenine batyp ketti
ASTANA. KAZINFORM — Eki kúnge sozylǵan izdestirý-qutqarý jumystarynyń nátıjesinde, Qostanaı oblysynyń Nechaevka aýyly mańyndaǵy Tobyl ózeninen er adam men kámeletke tolmaǵan qyzdyń denesi tabyldy. Bul týraly Kazinform agenttiginiń tilshisi jazdy.
Qostanaı oblysynyń Tótenshe jaǵdaılar departamentiniń málimetinshe, birinshi kúni súńgýir-qutqarýshylar kámeletke tolmaǵan qyzdyń denesin taýyp, sýdan alyp shyqqan. Er adamdy izdeý jumystary kelesi kúni jalǵastyryldy. Nátıjesinde onyń da denesi tabylyp, sýdan shyǵaryldy.
Eki kún ishinde qutqarýshylar Tobyl ózeniniń jaǵalaýyndaǵy shamamen 2,5 sharshy shaqyrym aýmaqty jaıaý tekserdi. Ushqyshsyz ushý apparatynyń kómegimen 12 gektarǵa jýyq aýmaq áýeden baqylaýǵa alyndy. Al súńgýirler sý aıdynynyń 39 myń sharshy metr túbin tekserdi.
Іzdeý jumystaryna polıtsııa qyzmetkerleri, jergilikti atqarýshy organdardyń ókilderi, eriktiler men jergilikti turǵyndar da qatysty.
Áleýmettik jelilerde qaıǵyly jaǵdaıda ákesi men qyzynyń qaza bolǵany týraly aqparat tarady.
Buǵan deıin ShQO-da jaz bastalǵaly 10 adam sýǵa ketkenin jazdyq.
