Qostanaı oblysynda aq tútek boranǵa qaramastan shuǵyl qyzmetter 2000-ǵa jýyq shaqyrtýǵa bardy
ASTANA. KAZINFORM – Qostanaı oblysynyń shuǵyl qyzmetteri sońǵy eki táýlik boıy kúsheıtilgen rejımde jumys istedi. Daýyldy aýa raıy jaǵdaıyna qaramastan shamamen 2 000 shaqyrtý qabyldanyp, qyzmet kórsetildi. Bul týraly Densaýlyq saqtaý mınıstrligi málim etti.
Joldardyń jabylýy jáne qarly boran kezinde kóriný deńgeıiniń is júzinde nólge teń bolýy jaǵdaıynda jedel járdem brıgadalary, onyń ishinde aýyldyq kishi stantsııalar, patsıentterge shyǵýdy jalǵastyryp otyr. Olar tipti shalǵaı eldi mekenderge de qar keship, jetip jatyr.
Ekstremaldy aýa raıy jaǵdaıynda medıtsına qyzmetkerleri qurysý sındromy bar patsıentterge, túrli jaraqat alǵandarǵa kómek kórsetti.
— Sondaı-aq mı qan aınalymynyń jedel buzylýy (MQAJB) dıagnozy qoıylǵan patsıentti evakýatsııalaý úshin birneshe saǵatqa sozylǵan kúrdeli operatsııa júrgizildi. Keıbir jaǵdaılarda Tótenshe jaǵdaılar mınıstrliginiń arnaıy tehnıkasy qar qursaýyn eńsere almaǵan kezde, feldsherler boran jaǵdaıynda jaıaý júrip, der kezinde medıtsınalyq kómek kórsetý úshin patsıentterge jetýge talpyndy, — dep jazdy vedomstvodan.
Sonymen qatar call-ortalyq mamandary patsıentterge qashyqtan qoldaý kórsetip, jedel járdem brıgadasy kelgenge deıin qajetti usynymdar berip, áreketterdi úılestirip otyrdy.
Qazaqstan Respýblıkasy Densaýlyq saqtaý mınıstrligi tabıǵat apatynyń qaq ortasynda óz qaýipsizdikterin qaterge tigip, qyzmettik mindetterin adal atqaryp júrgen medıtsına qyzmetkerleri men qutqarýshylarǵa alǵys bildiredi.
Buǵan deıin Jambyl oblysynda jedel járdem kólikteri qarǵa batyp qalyp jatqanyn jazǵan edik.
