Qostanaı oblysynda 96 mln teńge agrarlyq sýbsıdııany urlaǵandar sottaldy

QOSTANAI. KAZINFORM – Prokýratýranyń bastamasymen Qostanaı oblysynda asa iri mólsherde agrarlyq sýbsıdııalardy urlaǵan adamdar sottaldy.

Beıimbet Maılın aýdanynyń prokýratýrasy júrgizgen tekserý barysynda mal azyǵyn arzandatýǵa bólingen sýbsıdııalardy jáne selektsııalyq jumystar júrgizýge arnalǵan qarjyny urlaý faktileri anyqtalǵan.

- Atalǵan derek boıynsha aýdan prokýratýrasy Qylmystyq kodekstiń 190-baby 4-bóligi 2-tarmaǵy boıynsha (asa iri mólsherdegi alaıaqtyq) sotqa deıingi tergep-tekserýdi bastaǵan. Qylmystyq isti Qostanaı oblysynyń prokýratýrasy tekserip, úsh adamǵa qatysty is sotqa joldandy, - delingen baqylaýshy organnyń aqparatynda.

Tergeý nátıjesinde olardyń kinási dáleldendi. Sottalýshylar kinásin tolyq moıyndaǵandyqtan, qylmystyq is qysqartylǵan tártippen qaraldy.

Beıimbet Maılın aýdandyq sotynyń 2025 jylǵy 4 qyrkúıektegi úkimimen sottalýshylar ártúrli merzimge bas bostandyǵynan aıyryldy. Olar sot zalynda qamaýǵa alyndy.

Sonymen qatar, memleketke keltirilgen zalaldy óteý úshin sottalýshylardan 96 mln teńgeden astam qarajat óndirildi.

Úkim zańdy kúshine engen joq.

Aıta keteıik, Qostanaıdyń sottalǵan eks-ákimine tıesili meıramhana 91,4 mln teńgege satyldy.