Qostanaı oblysynda 90 myńnan astam kıik tirkeldi
QOSTANAI. KAZINFORM – Qostanaı oblysynda 90 myńnan astam kıik anyqtaldy. Qazirgi ýaqytta egis alqaptaryna qaýip joq, jaǵdaı baqylaýda. Bul týraly Qostanaı oblystyq orman sharýashylyǵy aýmaqtyq ınspektsııasynyń janýarlar dúnıesi jáne ańshylyq sharýashylyǵy bólimi málim etti.
2026 jylǵy 5 mamyrdaǵy málimet boıynsha, kıikterdiń negizgi shoǵyry Arqalyq qalasynan 50 shaqyrym jerdegi Qyzylsaı aýmaǵynda shoǵyrlanǵan. Munda shamamen 80 myń bas kıik tirkelgen.
Sonymen qatar Amangeldi aýdanynda 10 myńǵa jýyq kıik anyqtalsa, Qamysty jáne Jangeldın aýdandarynda – eki myńnan, Naýryzym aýdanynda 40-qa jýyq kıik bar. Al Áýlıekól men Qarasý aýdandarynda kıik tirkelmegen.
Óńirde táýlik boıy jeti mobıldi monıtorıng toby jumys istep jatyr. Baqylaý jumystaryna ushqyshsyz ushý apparattary tartylǵan. Mamandardyń aıtýynsha, janýarlardyń kóshý baǵyty aýyl sharýashylyǵy alqaptarynan alys jatqan dala arqyly ótýde.
Salalyq ınspektsııa ókilderi oblysta egis naýqany áli bastalmaǵanyn, qazirgi ýaqytqa deıin egistik jerlerdiń taptalý derekteri tirkelmegenin habarlady.
Máseleni úılestirý maqsatynda Qamysty aýdanynda arnaıy shtab otyrysy ótkizildi. 13 mamyr kúni Amangeldi aýdanynda Orman sharýashylyǵy jáne janýarlar dúnıesi komıteti, jergilikti atqarýshy organdar men agrarshylardyń qatysýymen taǵy bir keńes uıymdastyrylady.
Aýyl sharýashylyǵy taýaryn óndirýshiler yqtımal shyǵynnyń aldyn alý úshin qajetti kúshter men tehnıkalardy aıqyndaǵan. Jaqyn kúnderi óńirge basqa oblystardan qosymsha resýrstar jiberý josparlanyp otyr.
Mamandar kıikterdiń elimizdiń tabıǵı qorynyń bir bóligi ekenin eske salyp, olardy zańsyz joıý nemese janýarlarǵa qatygezdik kórsetý jaýapkershilikke ákeletinin atap ótti.
Aıta keteıik, buǵan deıin elimizde kıik sanaǵynyń nátıjesi jazda shyǵatyny habarlandy.
