Qostanaı oblysynda 86 jastaǵy er adamnyń máıiti tabyldy
ASTANA. KAZINFORM — Qostanaı oblysynda 86 jastaǵy er adamnyń máıiti tabylýyna baılanysty qylmystyq is qozǵaldy. Polıtsııa oqıǵanyń mán-jaıyn anyqtap, kúdiktini izdestirip jatyr.
Qostanaı oblystyq Polıtsııa departamenti baspasóz qyzmetiniń málimetinshe, qazir dálelderdi jınaý jáne bekitý, sondaı-aq kúdiktiniń jeke basyn anyqtap, ony ustaý maqsatynda tergeý amaldary júrgizilip jatyr.
Oqıǵany tergeýge qajetti kúshter men quraldar jumyldyrylǵan. Qylmysqa qatysy bar adamdy anyqtaý jáne ustaý jumystary táýlik boıy jalǵasyp jatyr.
Polıtsııa ekinshi adamǵa shabýyl jasalǵany týraly taraǵan aqparatty da joqqa shyǵardy.
— Ekinshi adamǵa shabýyl jasalǵany týraly aqparat shyndyqqa janaspaıdy. Tek resmı derekkózderge senýlerińizdi suraımyz, — dep málimdedi vedomstvo.
Tergeý barysy Qostanaı oblystyq Polıtsııa departamenti basshylyǵynyń jeke baqylaýynda. Tergeý múddesine baılanysty ózge aqparat QR Qylmystyq-protsestik kodeksiniń 201-babyna sáıkes jarııalanbaıdy.
Aıta keteıik, Esil ózeninen er adamnyń máıiti tabyldy.
Buǵan deıin Kókshetaýda taǵy bir sot qyzmetkeriniń máıiti tabylǵan bolatyn.
