Qostanaı oblysynda 80 jyl buryn salynǵan jol jóndeldi
QOSTANAI. KAZINFORM – «QazAvtoJol» ulttyq kompanııasy respýblıkalyq mańyzy bar KAZ-19 «Qostanaı — Rýdnyı — Denısovka — Komsomolskoe — Qarabutak» avtomobıl jolynyń 296 — 319 shaqyrym aralyǵyndaǵy Adaevka aýylynan Bestóbe aýylyna deıingi ýchaskesinde ortasha jóndeý jumystarynyń aıaqtalǵany týraly habarlady.
Jóndeýden ótken jol ýchaskesiniń jalpy uzyndyǵy 23 shaqyrymdy quraıdy.
— Atalǵan jol ýchaskesi Qamysty aýdanynyń aýmaǵynan ótedi jáne óńirdiń ákimshilik ortalyǵy — Qostanaı qalasyna kireberisterdiń biri bolyp sanalady, — delingen habarlamada.
Sondaı-aq, bul jol Aqtóbe oblysymen kólik qatynasyn qamtamasyz etip, Reseı Federatsııasymen memlekettik shekaraǵa shyǵýǵa múmkindik beredi. KAZ-19 avtomobıl jolynyń strategııalyq mańyzy bar, ol júk pen jolaýshylar tasymalynyń, sonyń ishinde halyqaralyq baǵyttardyń qozǵalysyn qamtamasyz etýde mańyzdy ról atqarady. Atalǵan ýchaskede sońǵy kúrdeli jóndeý jumystary 2017 jyly júrgizilgen.
Bul jol alǵash ret 1941 jyly salynǵan jáne sodan beri shuńqyrlardy jóndeý jumystaryn qospaǵanda, jol jabyny aıtarlyqtaı tozǵan.
Jobany júzege asyrýǵa 30 jol-qurylys tehnıkasy jáne 35 maman jumyldyryldy. Atqarylǵan jumystar avtomobıl jolynyń tehnıkalyq jaǵdaıyn qalpyna keltirýge, jol qozǵalysy qaýipsizdigin edáýir arttyrýǵa jáne óńirler arasyndaǵy turaqty kólik baılanysyn qamtamasyz etýge múmkindik berdi.
Al, Qostanaı oblystyq ákimdiginiń málimetinshe, óńir úshin mańyzy zor jol ınfraqurylymy jobasy júzege asty — A-21 «Qostanaı — Mamlıýtka» respýblıkalyq mańyzy bar avtojolynyń Ýzýnkól aýylynan Troebratskoe aýylyna deıingi 71 shaqyrymdyq ýchaskesi tolyq jóndeýden ótti. Bul joldyń qalpyna keltirilýi — jergilikti turǵyndar úshin kópten kútken jańalyq, sondaı-aq bılik pen merdiger uıymdardyń tıimdi áriptestiginiń naqty nátıjesi boldy.
Atalǵan avtojol alǵash ret 1978 jyly salynǵan. Sodan beri uzaq jyldar boıy joldyń jaǵdaıy kúrt nasharlap, kóp bóliginde asfalt jamylǵysy múlde tozyp, shuńqyrlar men oıyqtar paıda boldy. Keıbir jerlerde múlde asfalt bolmaǵan. Ásirese kúzgi jáne kóktemgi kezeńderde jolmen aýyr júk kólikteriniń ótýi múmkin emes edi. Bul jaǵdaı aýyl turǵyndarynyń kúndelikti tirshiligi men júk tasymalyna eleýli kedergi keltirdi.
Jol paıdalanýǵa berilgennen keıingi birneshe onjyldyq ishinde tek 2018 jyly ǵana 18 shaqyrymdyq (195–213 km) bóliginde ortasha jóndeý júrgizilgen. Alaıda bul búkil baǵyttaǵy jaǵdaıdy túzete almady.
Atalǵan avtojol Qostanaı men Soltústik Qazaqstan oblystaryn baılanystyryp qana qoımaı, Presnogorkovka aýyly arqyly Reseı Federatsııasyna shyǵatyn baǵytqa da jol ashady. Bul joldy kúndelikti Troebratskoe, Sataı, Fedorovka, Uqatqan, Sokol, Sibirka, Presnogorkovka, Esmurza, Quttyaıaq (Krýtoıarka), Volna, Beloglınka, Qyzylbor (Krasnyı Borok), Peschanka, Pervomaıka syndy aýyldardyń turǵyndary paıdalanady. Jalpy bul jol boıyndaǵy eldi mekenderde 6157 adam turady — bul aýdan halqynyń 34,5 paıyzyna teń.
Joldyń tolyq jóndelýi kólik qatynasynyń qaýipsizdigin arttyryp qana qoımaı, shalǵaı aýyldardyń oblys ortalyǵymen jáne basqa óńirlermen baılanysyn jeńildetip otyr. Endi aýyl turǵyndary jyldyń qaı mezgili bolmasyn esh qıyndyqsyz qatynaı alady, al kásipkerler men tasymaldaýshylar úshin jol qolaıly ári tıimdi bolady.
Jobanyń iske asýy — óńirlik ınfraqurylymdy damytýdyń, aýyl turǵyndarynyń ómir sapasyn jaqsartýdyń naqty kórinisi. Jóndeý jumystary barlyq standarttarǵa saı júrgizilgen, al jańartylǵan jol bóliginiń jaǵdaıy únemi baqylaýda bolady dep josparlanǵan.
Eske sala keteıik, QazAvtoJol buǵan deıin 1403 baılanys ortalyǵy 17 myńnan astam ótinimdi óńdegenin habarlaǵan edi.