Qostanaı oblysynda 719 mln teńgeniń 113 myń tekshe metr qumy zańsyz óndirilgen
ASTANA. KAZINFORM — QMA Qostanaı oblysy boıynsha departamenti jer qoınaýyn zańsyz paıdalaný jáne paıdaly qazbalardy óz betinshe óndirý faktileri boıynsha tergep-tekserýdi aıaqtady.
Tergeý amaldaryna saı, «STS-Tsement» JShS-niń basshysy memleket belgilep bergen jer qoınaýy ýchaskesinen tys jerde, Tobyl ózeniniń arnasy men jaǵalaýynan ónerkásiptik kólemde ózen qumyn zańsyz óndirýdi uıymdastyrǵan.
Jumystar ózen túbinen eki jer snarıadtyń kómegimen gıdromehanıkalandyrylǵan tásilmen júrgizilgen.
Óndirilgen ózen qumy baılanysy bar kásiporyndarǵa ótkizilgen. Jalpy satylǵan qum kólemi 113 myń tekshe metrden asyp, onyń quny 719 mln teńge.
— Zańsyz áreketterdiń saldarynan sý jáne jer resýrstaryna eleýli ekologııalyq zııan keltirilgen.
Atap aıtqanda, Tobyl ózeniniń arnasy ózgerip, jaǵalaý syzyǵy buzylǵan, gıdrologııalyq rejımge nuqsan kelip, batpaqtanǵan aýmaqtar paıda bolǵan.
Ǵaryshtyq túsirilimderdiń derekterine sáıkes, sý qory jerleriniń búlingen aýmaǵy 28 myń sharshy metrden asqan. Tabıǵı keshendi qalpyna keltirý úshin jaǵalaýdy bekitý, ózen arnasyn tazartý jáne búlingen jerlerdi rekýltıvatsııalaý jumystary qajet, — delingen QMA habarlamasynda.
Sot sanktsııasymen kúdiktige tıesili múlikke tyıym salyndy. Atap aıtqanda, 12 avtokólikke, 10 jer ýchaskesine jáne bir turǵyn emes úı-jaıǵa tyıym salyndy.
Qylmystyq is sotqa joldandy.
Qazaqstan Respýblıkasy Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy.
Aıta ketelik QMA Abaı oblysynda zańsyz metall óndirýmen aınalysqan topty áshkerelegen edi.
