Qostanaı oblysynda 716 saılaý ýchaskesi daýys berýge daıyn
ASTANA. KAZINFORM — Quryltaı depýtattaryn saılaý qarsańynda OSK múshesi Mıhaıl Bortnık Qostanaı oblysyndaǵy saılaý ýchaskelerine baryp, jumys kezdesýlerin ótkizdi. Kezdesýler barysynda saılaý protsesin uıymdastyrýǵa jáne komıssııalardyń saılaýǵa daıyndyǵyna erekshe nazar aýdaryldy.
Ortalyq saılaý komıssııasy baspasóz qyzmetiniń málim etkenindeı, sapar barysynda Mıhaıl Bortnık daýys berý úshin jasalǵan jaǵdaılarmen, saılaý ýchaskeleriniń materıaldyq-tehnıkalyq jaraqtandyrylýymen jáne ýchaskelerdegi jumystyń uıymdastyrylýymen tanysty. Memlekettik organdardyń, aýmaqtyq jáne ýchaskelik komıssııalardyń ókilderimen ótken jumys keńesterinde saılaýǵa daıyndyqtyń ózekti máseleleri jáne daýys berý kúni ózara is-qımyl jasaý máseleleri talqylandy.
— Qostanaı oblysynda aldaǵy Quryltaı saılaýyna 716 saılaý ýchaskesi daıyndaldy. Olardyń barlyǵy daýys berýge arnalǵan jáshiktermen jáne kabınalarmen jabdyqtalǵan, múgedektigi bar saılaýshylar men baıqaýshylar úshin qajetti jaǵdaılar jasalǵan, — delingen habarlamada.
Tamyz aıynyń basynan bastap 4 310 saılaý komıssııasynyń múshesi jumysqa kiristi. Olardyń daýys berýge daıyndyǵy saılaýshylar tizimderin naqtylaýdy, azamattardy aqparattandyrýdy, esepten shyǵarý kýálikterin berýdi, sondaı-aq úı-jaılardyń daıyndyǵyn jáne barlyq saılaýshylar úshin jasalǵan jaǵdaılardy tekserýdi jáne basqa da jumystardy qamtıdy.
Qostanaı oblystyq aýmaqtyq saılaý komıssııasynyń tóraǵasynyń aıtýynsha, aýdandyq jáne ýchaskelik saılaý komıssııalarynyń múshelerin oqytý aıaqtaldy. Olardyń barlyǵy testileýden ótip, daýys berý kezeńinde jumys isteýge qajetti daıyndyq deńgeıin rastady.
Sapar barysynda Mıhaıl Bortnık Qostanaı aýdanyndaǵy № 548 jáne № 881 saılaý ýchaskeleriniń, sondaı-aq Qostanaı qalasyndaǵy № 21, № 53, № 60 jáne № 879 saılaý ýchaskeleriniń jumysyn uıymdastyrýmen tanysty.
Osyǵan deıin Quryltaı saılaýyna baılanysty Almatyda qoǵamdyq kólik tegin bolatynyn jazǵanbyz.
