Qostanaı oblysynda 600 gektar aýmaqty sharpyǵan órt sóndirildi
ASTANA. KAZINFORM – Qostanaı oblysynyń Denısov aýdanynda bir táýlik ishinde birneshe órt tirkelip, barlyq órt oshaǵy tolyq sóndirildi, dep habarlaıdy QR Tótenshe jaǵdaılar mınıstrligi.
8 qyrkúıekte Grıshenka jáne Qaraoba aýyldarynyń mańynda qurǵaq shóp órtengen. Órt shamamen 600 gektar aýmaqty sharpydy.
Tilsiz jaýdy sóndirýge 70-ten astam adam men 15 tehnıka jumyldyryldy. Sondaı-aq TJM-niń ushqyshsyz ushý apparaty, jergilikti atqarýshy organdar men «Aýyl qutqarýshylary» erikti órtke qarsy qurylymdarynyń kúshteri jáne «Qazaqstan temir joly» UK» AQ-nyń órt sóndirý poıyzy paıdalanyldy.
– Bir táýlik ishinde Qostanaı oblysynyń Denısov aýdanynda birneshe órt oqıǵasy tirkeldi. Grıshenka jáne Qaraoba aýyldarynyń mańyndaǵy órt shamamen 600 gektar aýmaqta sóndirildi. Antonovka jáne Georgıevka aýyldaryndaǵy órt oshaqtary da tolyq joıyldy. Oqıǵalar saldarynan zardap shekkender joq, – delingen TJM habarlamasynda.
Antonovka aýylynda da qurǵaq shóp órtenip, jalyn úsh jeke turǵyn úı aýlasyndaǵy sharýashylyq qurylystaryna jáne eki turǵyn úıdiń shatyr astyndaǵy bólikterine taraǵan.
Órt 200 sharshy metr aýmaqta sóndirildi. Zardap shekkender joq.
Sonymen qatar Georgıevka aýylynda órt shyǵyp, turǵyn emes úı men sharýashylyq qurylystaryn sharpydy. Órt shamamen 80 sharshy metr aýmaqta sóndirildi.
TJM málimetinshe, Georgıevka aýylyndaǵy órttiń shyǵý sebepteri anyqtalyp jatyr.
Barlyq órt oshaǵyn sóndirýge TJM, jergilikti atqarýshy organdar, «Aýyl qutqarýshylary» erikti órtke qarsy qurylymdary jáne basqa da uıymdardyń kúshteri men quraldary jumyldyryldy.
Aıta keteıik, Aqmolada orman órtimen ondaǵan adam men tehnıka kúresip jatyr.
