Qostanaı oblysynda 6 mektep ashanasyna sanıtarlyq qorytyndy nege berilmedi
ASTANA. KAZINFORM — Qostanaı oblysyndaǵy alty mekteptiń as blogyna sanıtarııalyq-epıdemıologııalyq qorytyndy áli alynbaǵan. Máseleni jańa oqý jyly bastalǵanǵa deıin sheshý josparlanyp otyr, dep habarlaıdy Kazinform agenttiginiń tilshisi.
Oblystyq bilim basqarmasynyń basshysy Ardaq Begatarovtyń aıtýynsha, qazirgi tańda óńirdegi 426 mekteptiń as blogyna sanıtarııalyq-epıdemıologııalyq qorytyndy berilgen. Taǵy alty bilim berý uıymy qajetti qujattardy tapsyryp qoıǵan.
Olardyń qatarynda Altynsarın aýdanyndaǵy Lermontov jáne Dımıtrov jalpy bilim beretin mektepteri, Qarasý aýdanyndaǵy Qaramyrza mektebi, Amangeldi aýdanyndaǵy M. Meıirmanov atyndaǵy jáne Jaldamın mektepteri, sondaı-aq Arqalyqtaǵy Saryózen orta mektebi bar.
Atalǵan mektepterdiń as bloktaryna sanıtarııalyq-epıdemıologııalyq qorytyndyny jańa oqý jyly bastalǵanǵa deıin alý josparlanyp otyr.
Qostanaı aýdanyndaǵy Eńbek aýylyndaǵy mektepte jaǵdaı bólek. Munda mektep ǵımaratyna sanıtarııalyq-epıdemıologııalyq qorytyndy joq. Máseleni qurylys basqarmasy nysandy paıdalanýǵa berý aktisin rásimdegennen keıin sheshý josparlanǵan.
Jalpy, oblystaǵy 323 mektepte ashana jumys isteıdi, 76 mektepte býfet arqyly tamaqtandyrý uıymdastyrylǵan. Al 33 mektepte oqýshylarǵa tamaq keıterıng qyzmeti arqyly beriledi.
Buǵan deıin Aqmola oblysyndaǵy keıbir mektepterdiń as bloktary tıisti ruqsattyń bolmaýyna baılanysty jabylǵan edi.
