Qostanaı oblysynda 500-den astam nysan múmkindigi shekteýli azamattarǵa beıimdelmegen
ASTANA. KAZINFORM – Qostanaı oblysyndaǵy qoljetimdilik kartasyna engizilgen 1 905 áleýmettik jáne kólik ınfraqurylymy nysanynyń 1 367-si ǵana múgedektigi bar adamdar men júrip-turýy shekteýli azamattar úshin tolyq beıimdelgen. Bul týraly óńirlik kommýnıkatsııalar qyzmetinde ótken brıfıngte málim boldy.
Jumyspen qamtýdy úılestirý jáne áleýmettik baǵdarlamalar basqarmasynyń málimetinshe, óńirde múgedektigi bar adamdar men basqa da júrip-turýy shekteýli azamattar úshin kedergisiz orta qalyptastyrý jumystary jalǵasyp jatyr.
Qoljetimdilik kartasyna engizilgen 1 905 nysannyń 1 367-si tirek-qımyl apparaty buzylǵan, arba paıdalanatyn azamattar, sondaı-aq kórý jáne estý qabileti buzylǵan adamdar úshin tolyq qoljetimdi dep tanylǵan.
– Bıyl qala jáne aýdan ákimdikteri áleýmettik jáne kólik ınfraqurylymynyń taǵy 282 nysanyn beıimdeýdi josparlap otyr, – dep habarlady basqarma ókilderi.
Sonymen qatar 2026 jylǵy 1 shildeden bastap júrip-turýy shekteýli azamattar úshin nysandardyń qoljetimdiligin rastaý ókilettigi Áleýmettik qorǵaý salasyndaǵy retteý jáne baqylaý komıtetiniń aýmaqtyq departamentterine berildi. Buǵan deıin bul fýnktsııany jergilikti atqarýshy organdar atqarǵan.
Aıta keteıik, buǵan deıin Mańǵystaý oblysynda ınvataksı qyzmetinen zańbuzýshylyq anyqtalǵany habarlanǵan bolatyn.
