Qostanaı oblysynda 50-ge jýyq ruqsat etilmegen qoqys úıindisi anyqtaldy
QOSTANAI. KAZINFORM - Anyqtalǵan 48 qoqys úıindisiniń 35-i joıyldy.
Qostanaı oblysynyń polıtsııa departamentiniń túsindirýinshe, reıdter elimiz boıynsha ótkizilip jatqan «Taza Qazaqstan» respýblıkalyq ekologııalyq aktsııasy aıasynda júrgizilip jatyr. Qostanaı oblysynda ruqsat etilmegen qoqys úıindilerimen kúres júıeli túrde júrgizilip keledi, 2024 jyldyń basynan beri óńirde shamamen 5 myń tekserý júrgizilgen.
Qostanaı oblysy PD JPQB aǵa ınspektory Tolqyn Ábilnasyrovtyń aıtýynsha, reıd nátıjesinde 48 ruqsat etilmegen qoqys orny anyqtalyp, olardyń 35-i joıylǵan.
Sondaı-aq aktsııa aıasynda abattandyrý erejelerin buzýdyń 4 000-nan astam deregi jáne ortaq paıdalaný oryndaryn lastaýdyń 783 faktisi tirkelgen.
— Oblys ortalyǵynda jyl basynan beri tórt iri qoqys orny anyqtaldy. Ákimshilik jaýapkershilikke shamamen 1 500 adam tartyldy. Bul zańbuzýshylyqtar QR ÁQBtK-niń 505 jáne 344-baptary boıynsha tirkeledi, — dedi Qostanaı qalalyq polıtsııa basqarmasynyń jergilikti polıtsııa bóliminiń bastyǵy Ernur Altaev.
Jaǵdaıdy baqylaý úshin «Ǵarysh sapary» spýtnıktik júıesi qoldanylady. Bul júıe qoqys oryndarynyń paıda bolýy men joıylýyn baqylaýǵa, naqty esep júrgizýge jáne ákimdikter jumysynyń tıimdiligin baǵalaýǵa múmkindik beredi.
Sondaı-aq, sheshimderdiń biri retinde qoqys jınalatyn oryndarǵa ornatylatyn mobıldi «foto-qaqpan» kameralary engizildi. Bul qurylǵylar zań buzý áreketterin tirkep, kinálilerdi jedel anyqtaýǵa múmkindik beredi.
Osyǵan deıin Qostanaıda qoqys polıgony órtengeni týraly habarladyq.