Qostanaı oblysynda 455 ga paıdalanylmaǵan egistik memleketke qaıtaryldy
ASTANA. KAZINFORM — Qostanaı oblysy Qamysty aýdanynyń prokýratýrasy qadaǵalaý qyzmeti barysynda sharýa qojalyǵy Qamysty aýdany Aralkól aýyldyq okrýginde ornalasqan 455 gektar jer ýchaskesin nysanaly maqsaty boıynsha paıdalanbaǵany anyqtady.
Aýyl sharýashylyǵy daqyldaryn egýge arnalǵan jer telimi uzaq ýaqyt paıdalanylmaǵan, egistik jer óńdelmegen jáne aramshóp basyp ketkeni anyqtaldy.
Qazaqstan Respýblıkasy Jer kodeksiniń 92-baby 4-tarmaǵynyń 1) tarmaqshasyna sáıkes sharýa nemese fermer qojalyǵyn nemese aýyl sharýashylyǵy óndirisin júrgizý úshin berilgen jer ýchaskesin paıdalanbaý jaǵdaılaryna egistikte jer ýchaskesin aýyl sharýashylyǵy daqyldaryn egý úshin óńdeý jónindegi jumystardyń júrgizilmeýi jatady.
Prokýrorlyq qadaǵalaý aktisi boıynsha jer zańnamasy boıynsha zań buzý joıyldy. Qamysty aýdandyq sotynyń sheshimimen kadastrlyq quny 10 mıllıon teńge bolatyn jer ýchaskesi memlekettik menshikke májbúrlep alyndy.
Qaıtarylǵan jer ýchaskesi aýdannyń arnaıy jer qoryna engizildi jáne jer zańnamasyna sáıkes sharýa (fermer) qojalyǵyn júrgizý úshin azamattarǵa qaıta bólinedi.
Aıta ketelik Katonqaraǵaıda paıdalanylmaǵan jer ýchaskeleri memleket menshigine ótti.
