Qostanaı oblysynda 40 jyl boıy jóndelmegen jol qalypqa keltiriledi

QOSTANAI. KAZINFORM – Qostanaı oblysynda 40 jyl boıy jóndeý kórmegen tas joldy qalypqa keltirý jumystary bastalady. 

«QazAvtoJol» UK» AQ málimetinshe, atalǵan óńirdegi respýblıkalyq mańyzy bar kúre joldardyń jalpy uzyndyǵy 1 534 shaqyrymdy quraıdy jáne onyń 82% qanaǵattanarlyq deńgeıde. Keıbir ýchaskelerdiń jóndelmegenine 40 jyldaı bolǵanyn halyq ta, jolshylar da aıtyp júr. Osy maqsatta óńirdegi avtojoldardy qalypqa keltirý boıynsha aýqymdy is-sharalar kesheni bastalmaq.

Bıyl oblysta respýblıkalyq mańyzdaǵy 6 avtojoldyń jalpy jıyny 187 shaqyrymynda ortasha jóndeý jumystaryn júrgizý josparlanǵan. Zamanaýı tehnologııalardy paıdalaný arqyly jol jabyny jańartylyp, barlyq paıdalanýshyǵa sapaly jolmen qaýipsiz qozǵalys qamtamasyz etiledi. Onyń ishinde R-63 «Denısovka-Tarvıchenko-Arshaly-Komarovka» jáne R-36 «Qostanaı-Áýlıekól-Surǵan» avtojoldary 2023 jyly jóndele bastaǵan.