Qostanaı oblysynda 392 jumysshyǵa 711 mln teńge jalaqy bereshegi anyqtaldy
ASTANA. KAZINFORM – Qostanaı oblysynda jyl basynan beri eńbek ınspektorlary eńbek zańnamasynyń 134 ret buzylǵanyn anyqtady. Jumys berýshiler tarapynan eńbek shartyn jasamaý, jalaqyny keshiktirý jáne qyzmetkerler týraly málimetterdi Eńbek sharttaryn esepke alýdyń biryńǵaı júıesine engizbeý derekteri jıi kezdesken.
2026 jyldyń basynan beri memlekettik eńbek ınspektorlary 182 tekserý júrgizgen. Salystyrmaly túrde, 2025 jyldyń osy kezeńinde 101 tekserý bolǵan. Byltyr 91 zań buzýshylyq anyqtalsa, bıyl olardyń sany 134-ke jetti.
Zań talaptaryn buzǵan jumys berýshilerge eki eskertý jasalyp, jalpy somasy 16 mln teńgeden asatyn 85 ákimshilik aıyppul salyndy. Anyqtalǵan zań buzýshylyqtardyń basym bóligi joıylǵan.
– Jıi kezdesetin zań buzýshylyqtardyń qatarynda qyzmetkerlermen eńbek sharttaryn jasamaý, jalaqy men basqa da tıisti tólemderdi ýaqytynda nemese tolyq tólemeý bar, – delingen málimette.
Sondaı-aq eńbek mindetterin atqarý kezinde jazataıym oqıǵalardan qyzmetkerlerdi mindetti saqtandyrý sharttarynyń bolmaýy jáne eńbek shartyn jasaý nemese toqtatý týraly málimetterdi Eńbek sharttaryn esepke alýdyń biryńǵaı júıesine engizbeý jaǵdaılary anyqtalǵan.
Óńirdegi ózekti máselelerdiń biri – jalaqy boıynsha bereshek. «ıAzykovoı tsentr Grand Luxe» JShS 15 qyzmetkerine 6,5 mln teńge qaryz bolǵan.
Al «ABZ Plıýs» JShS-de júrgizilgen tekserý barysynda 2026 jyldyń naýryz-shilde aılary aralyǵynda 392 qyzmetkerge jalpy somasy 711 mln teńge jalaqy bereshegi bary anyqtalǵan.
2026 jylǵy 5 tamyzda Qostanaı oblysynyń mamandandyrylǵan aýdanaralyq ekonomıkalyq soty «ABZ Plıýs» JShS-ne qatysty ońaltý rásimin qoldandy.
Departament jumys berýshilermen jáne jeke sot oryndaýshylarymen birlesip, jalaqy boıynsha bereshekti óteý jáne qyzmetkerlerdiń eńbek quqyqtaryn qalpyna keltirý jumystaryn jalǵastyryp jatyr.
Aıta keteıik, Semeı ormanynyń 80 qyzmetkerine 41 mln teńge jalaqy qaryzy tólendi.
