Qostanaı oblysynda 380 mlrd teńgege óńirdegi eń iri jel elektr stansasy salynady
ASTANA. KAZINFORM – Memleket basshysy Qasym-Jomart Toqaevtyń jańartylatyn energııa kózderin damytý jónindegi tapsyrmalaryn júzege asyrý sheńberinde Qazaqstan Respýblıkasynyń Úkimeti Energetıka mınıstrligi men «Turan Wind Energy» JShS arasyndaǵy qýaty 1000 MVt bolatyn jel elektr stansasyn jáne qýaty 300 MVt elektr energııasyn jınaqtaý júıesin salý boıynsha Kelisimge qol qoıýdy maquldady.
Tıisti qaýlyǵa Premer-mınıstr Oljas Bektenov qol qoıdy, dep habarlaıdy Úkimettiń baspasóz qyzmeti.
Jobaǵa salynǵan ınvestıtsııa kólemi shamamen 380 mlrd teńgeni quraıdy. Qurylys 2027 jyldyń kókteminde bastalady, jumystardy aıaqtaý jáne paıdalanýǵa berý 2029 jyldyń sońyna josparlanǵan.
Jańa jel elektr stansasy Qostanaı oblysyndaǵy jańartylatyn energetıkanyń iri nysanyna aınalady.
Jobany júzege asyrý Qostanaı oblysynyń energetıkalyq ınfraqurylymyn damytýǵa, jańa ınvestıtsııalar tartýǵa, óńirdiń áleýmettik-ekonomıkalyq damýy úshin qosymsha múmkindikter jasaýǵa yqpal etetin bolady. 750 jańa jumys ornyn ashý josparlanyp otyr.
Joba jańartylatyn energetıkany odan ári damytý jáne Qazaqstannyń energetıkalyq balansyn ártaraptandyrý úshin strategııalyq mańyzǵa ıe. Stansa qurylysy elimizdiń energııa teńgerimindegi JEK úlesin ulǵaıtý jónindegi jumystyń bir bóligi bolmaq, ol boıynsha nysanaly kórsetkishter balamaly energııa kózderin eskere otyryp, 2030 jylǵa qaraı 15%-ǵa deıin jáne 2050 jylǵa qaraı 50%-ǵa deıin jetedi.
Osyǵan deıin Qyzylorda oblysynda qýaty 20 MVt kún elektr stantsııasy iske qosylǵany týraly jazdyq.
