Qostanaı oblysynda 363 gektar jaıylymdyq jer memleketke qaıtaryldy
QOSTANAI. KAZINFORM – Altynsarın aýdanynyń prokýratýrasy jaıylym jerlerdi jáne memlekettik sýbsıdııalardy zańsyz paıdalaný faktilerin anyqtady.
Prokýrorlyq qadaǵalaý barysynda aýdannyń birqatar aýyl sharýashylyǵy kásiporyndary jaıylym jerlerdi nysanaly maqsatyna saı paıdalanbaǵany belgili boldy. Sonymen qatar asyl tuqymdy mal sharýashylyǵyn damytýǵa bólingen bıýdjet qarajatyn alý kezinde zań talaptarynyń saqtalmaǵany anyqtalǵan.
Tekserý nátıjesinde bir aýyl sharýashylyǵy kásipornynyń jetkilikti mal basy bolmaǵanyna qaramastan 363 gektar jaıylymdy paıdalanyp kelgeni belgili boldy.
– Aýyl sharýashylyǵy kásiporny QR Jer kodeksiniń 92-baby men «Jaıylymdar týraly» zańnyń 14-baby talaptaryn buza otyryp, mal jaıý jáne jem-shóp daıyndaý úshin qajetti mal basyn ustamaı, jaıylym jerlerdi paıdalanǵan, – dep habarlady Qostanaı oblysynyń prokýratýrasy.
Sondaı-aq bes aýyl sharýashylyǵy qurylymynyń memleketten alǵan sýbsıdııalardy zań talaptaryna sáıkes paıdalanbaǵany anyqtaldy.
– Bes sharýashylyq asyl tuqymdy mal sharýashylyǵyn damytýǵa bólingen 38 mln teńgeden astam sýbsıdııany iri qara maldyń analyq basyn eki jyl boıy saqtaý jónindegi mindettemelerin oryndamaı alǵan, – delingen habarlamada.
Prokýrorlyq qadaǵalaý aktileriniń nátıjesinde anyqtalǵan zań buzýshylyqtar joıylyp, memleketke jaıylym jerler qaıtaryldy. Sonymen qatar zańsyz alynǵan sýbsıdııalar tolyq kólemde bıýdjetke óndirildi.
Qadaǵalaý organynyń málimetinshe, qaıtarylǵan jer ýchaskeleri aýdannyń arnaıy jer qoryna engizilip, qoldanystaǵy zańnamaǵa sáıkes sharýa jáne fermer qojalyqtaryn júrgizý úshin azamattarǵa qaıta bólinetin bolady.
Aıta keteıik, Jambyl oblysynda ınvestorǵa tıesili jer basqa adamǵa zańsyz berilgen.
