Qostanaı oblysynda 300 jumys orny ashylady: prokýratýra ınvestorǵa keltirilgen kedergilerdi joıdy
QOSTANAI. KAZINFORM - Qostanaı oblysynyń prokýratýrasy ınvestorlardyń quqyqtaryn qorǵaý komıtetiniń úılestirýimen «DS Corporation» JShS-niń quqyqtaryn qalpyna keltirdi, dep habarlaıdy Qostanaı oblystyq prokýratýrasynyń baspasóz qyzmeti.
Kompanııa saýda-oıyn-saýyq ortalyǵy bar qonaqúı keshenin salý jobasyn júzege asyryp jatyr.
Investıtsııalardyń jalpy kólemi 8 mlrd teńgeni quraıdy, bul 300 jańa jumys ornyn ashýǵa múmkindik beredi.
Nysan oblys ortalyǵyna jaqyn mańda salynyp jatyr. Qonaqúı men saýda-oıyn-saýyq ortalyǵynan bólek, keshen quramyna balalar attraktsıondary men avtokólikterge arnalǵan servıstik aımaq kiredi.
Joba zamanaýı demalys ınfraqurylymyn qalyptastyryp, óńirdiń týrıstik tartymdylyǵyn arttyrýǵa múmkindik beredi.
Anyqtalǵandaı, Meńdiqara aýdany boıynsha Memlekettik kirister basqarmasy elektrondyq shot-faktýrany jazyp bermegeni úshin ınvestordy ákimshilik jaýaptylyqqa tartqan.
Alaıda ákimshilik quqyqbuzýshylyq týraly hattama prokýratýramen mindetti kelisilmeı jasalǵan, bul zań talaptaryn buzý bolyp tabylady.
-Meńdiqara aýdany prokýrorynyń narazylyǵy boıynsha sot ákimshilik jaýaptylyqqa tartý týraly qaýlynyń kúshin joıyp, is boıynsha óndiristi toqtatty. Investordyń quqyqtary tolyq kólemde qalpyna keltirildi. «Prokýrorlyq fıltr» tetigi sheńberinde ınvestorlarǵa qatysty kez kelgen shekteý nemese ákimshilik sıpattaǵy sharalar prokýratýra organdarymen mindetti túrde kelisilýi tıistigin aıta ketý kerek,-delingen habarlamada.
Bıznesti qorǵaý jáne qolaıly ınvestıtsııalyq ahýal qalyptastyrý qadaǵalaý qyzmetiniń basym baǵyttarynyń biri bolyp qala beredi. Qostanaı oblysynyń prokýratýrasy ákimshilik kedergilerge tap bolǵan ınvestorlar kelesi telefon nómirleri arqyly habarlasýǵa bolatynyn túsindiredi: +7 (701) 855-87-06 nemese 115 Call-ortalyǵy.
Osyǵan deıin prokýratýra respýblıkalyq joldaǵy zańsyz shekteýdi toqtatqan bolatyn.
