Qostanaı oblysynda 1900-den astam adamdy ıt qapty

QOSTANAI. KAZINFORM – Bıylǵy jyldyń 9 aıynda qutyrmaǵa qarsy em izdegenderdiń sany ótken jylmen salystyrǵanda 726-ǵa ósip, 3058-di qurady. Zardap shekkenderdiń arasynda myńǵa jýyq bala bar.

Aımaqta jedel járdem shaqyrýshylardyń deni úı janýarlarynan zardap shekkender. Byltyr 2223 jaǵdaı tirkelse, bıyl kórsetkish 2907-ge jetken. Onyń ishinde 1913 adamdy ıt qapqan. Byltyr bul kórsetkish 1582 bolatyn. Sondaı-aq 976 adam (2024 jyly 641) mysyqtan, 18 adam qoradaǵy maldan zardap shekken. 151 adamǵa tyshqan, qasqyr, túlki, qarsaq jáne basqa da jabaıy janýarlar tap bergen, — dedi oblys boıynsha sanıtarııalyq-epıdemıologııalyq baqylaý departamenti basshysynyń orynbasary Gúlim Dosymova.

Sonymen qatar, úı janýarlardyń 1443 adamǵa shabýyly tirkeldi. Onyń ishinde myńnan astam ıt qabý jáne 400-den astam mysyq tyrnaý oqıǵasy bar.

Mamandardy adamdardyń janýarlardan jaraqat alýy kóbeıip kele jatqandyǵy alańdatady. Toǵyz aıda 1300-den astam adam bas, bet, moıyn jáne qolynan jaraqat alǵan.

Sońǵy rastalǵan qutyrý oqıǵasy 2025 jyldyń maýsymynda Lısakovsk qalasynda tirkelgen. Jábirlenýshi oqys oqıǵadan keıin medıtsınalyq kómekke júginbegen, profılaktıkalyq ekpe almaǵan.

Aıta keteıik, Óskemende bir aptada 20-dan astam adamdy ıt qapsa, Batys Qazaqstan oblysynda 4 aıda 600-ge jýyq adamǵa qutyrǵan ıt tap bergen.