Qostanaı oblysynda 28 eldi meken jaryqsyz qaldy
ASTANA. KAZINFORM – Qostanaı oblysynda 28 eldi meken jaryqsyz qaldy. Bul týraly Qostanaı oblysy ákiminiń orynbasary Arman Ábenov aıtty.
«Sý tasqynynan zardap shekkenderdiń barlyǵyna kómek kórsetý jónindegi jumys jalǵastyrylyp jatyr. Birjolǵy áleýmettik tólemder bastaldy. Sondaı-aq demeýshilik jáne gýmanıtarlyq kómek kórsetilýde. Búgingi tańda 50 aılyq eseptik kórsetkish mólsherindegi áleýmettik kómek 587 otbasyna 107,3 mln teńge somasynda tólendi», - dedi ol Ortalyq kommýnıkatsııalar qyzmetindegi brıfıngte.
Onyń dereginshe, apattyq ajyratylýy sebepti 28 eldi meken elektrmen jabdyqtaýsyz qalyp otyr. Búgingi kúnde elektr baǵandary sýda qalǵan. Bul olardy qalpyna keltirý jumystaryn qıyndatýda. Sý ketkennen keıin jumys jalǵastyrylatyn bolady.
«Sý tasqyny kezinde 24 avtojolda qozǵalys shekteldi, al 9 joldaǵy qozǵalys qazirdiń ózinde qalpyna keltirildi. Qalǵandary boıynsha jumystar jalǵastyrylýda. Arnaıy qurylǵan komıssııalar keltirilgen zalaldy baǵalaý boıynsha jumys istep jatyr. Osy baǵalaý qorytyndysy boıynsha barlyq zardap shekkenderge zalal tolyq óteledi», - dedi Arman Ábenov.
