Qostanaı oblysynda 266 áleýmettik nysan múgedektigi bar jandarǵa tolyq beıimdeldi
Múgedektigi bar adamdardyń zańdy quqyqtaryn qamtamasyz etý maqsatynda Qostanaı oblysynda erekshe qajettilikteri bar jandardyń barlyq sanattary úshin 266 áleýmettik ınfraqurylym obektileri beıimdeldi, dep habarlaıdy Kazinform.
Budan buryn habarlanǵandaı, elimizde 2027 jylǵa deıin Qazaqstan Respýblıkasynda múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi ulttyq jospar, «Amanat» partııasynyń Jol kartasy jáne Memleket basshysynyń tapsyrmasy boıynsha ázirlengen «Halyqpen birge» jobasy iske asyrylýda.
Jobada qol jetimdiliktiń ınteraktıvti kartasy saıtyna engizilgen el boıynsha beıimdelýi tıis 35 myńnan astam basym obektiler aıqyndaldy. 2021-2022 jyldary 8 myńnan astam nysan beıimdeldi. 2023-2027 jyldar kezeńinde jyl saıyn keminde 5 myń obekt (5 jylda 27 myń) beıimdelýge tıis. Osy jylǵy 1 jeltoqsandaǵy jaǵdaı boıynsha 2021-2022 jyldardy qosa alǵanda, 12 169 nysan beıimdeldi.
Qostanaı oblysynda aldaǵy 5 jylda múgedektigi bar adamdardyń barlyq sanattary úshin 1329 nysandy beıimdeý qarastyrylǵan. Qazirgi ýaqytta 2023 jylǵa beıimdeýge josparlanǵan 266 obektiniń ishinen jergilikti atqarýshy organdar barlyq 266 obektide beıimdeý is-sharalaryn júrgizdi.
Máselen, óńirde múgedektigi bar adamdardyń barlyq sanattaryna qol jetimdi:
- bilim berý nysandary – 66 (mektepter, balabaqshalar);
- mádenıet nysandary – 2;
- sport nysandary – 5;
- densaýlyq saqtaý nysandary – 23 (aýdandyq jáne qalalyq aýrýhanalar, FAPtar, ambýlatorııalar);
- memlekettik mekemeler – 89 (qalalyq, aýdandyq, aýyldyq ákimdikter men bólimder);
- qyzmet kórsetý salasynyń obektileri – 81.
Birinshi top múgedektigi bar Ilıa Vırahovskııdiń aıtýynsha, aımaqta erekshe qajettilikteri bar adamdar úshin jaǵdaı aıtarlyqtaı jaqsaryp, qajetti jaǵdaılar jasalýda.
«Menshik ıeleri obektilerdi qurylys normalaryna sáıkes keltirýge tyrysady. Kóptegen kásipkerler men memlekettik organdar shaǵymdar men usynystardy eskere otyryp, kirý toptaryn normaǵa sáıkes keltirýde. Abaı kóshesindegi №6 emhanaǵa barǵan kezde densaýlyq saqtaý mekemesiniń qoljetimdiligi, esikterdiń standartqa sáıkes keletini, lıft yńǵaıly jumys isteıtini kóńil qýantady. Jaqynda men Halyq bankiniń bólimshesinde boldym, onda kireberis toby qaıta qurylyp, kireberis alańy keńeıtilgen, kireberis esikteri aýystyrylǵan, múgedekter arbasyna arnalǵan arnaıy kassa, taktıldi plıtkalar men kórsetkishter ornatylǵan. Bul qala turǵyndarynyń, sonyń ishinde ózim de eń kóp baratyn oryndardyń biri, – dedi Ilıa Vırahovskıı.
Budan basqa, memlekettik baqylaý sheńberinde Eńbek jáne áleýmettik qorǵaý komıtetiniń Qostanaı oblysy boıynsha departamenti memlekettik basqarý, densaýlyq saqtaý, áleýmettik qorǵaý, mádenıet jáne t. b. salalardaǵy áleýmettik ınfraqurylym obektilerine 122 tekserý júrgizdi, onyń ishinde: 32 jospardan tys tekserý, 49 profılaktıkalyq baqylaý sheńberinde jáne prokýratýranyń talaby boıynsha 41 tekserý júrgizildi
Tekserý qorytyndysy boıynsha obektilerdiń basshylyǵyna anyqtalǵan buzýshylyqtardy joıý týraly 70 uıǵarym berilip, 6 mln 614,2 myń teńge somasyna 41 ákimshilik aıyppul salyndy.
Nysandardyń menshik ıelerine profılaktıkalyq baqylaý júrgizý kezinde buzýshylyqtar alǵash ret anyqtalǵan kezde olardy ákimshilik jaýapkershilikke tartpaı, joıý týraly nusqamalar ǵana beriletinin atap ótý qajet. Nusqama belgilengen merzimde oryndalmaǵan jaǵdaıda aıyppul salynady.
