Qostanaı oblysynda 240 mln teńgeden astam alıment bereshegi óndirildi
ASTANA. KAZINFORM — Qostanaı oblysynda alıment tóleýden jaltarǵan 157 boryshker ákimshilik jáne qylmystyq jaýapkershilikke tartyldy, nátıjesinde 240 mıllıon teńgeden astam bereshek óndirildi. Bul týraly óńirdegi prokýratýra málim etti.
Alımenttik mindettemelerdi boldyrmaý úshin kiristerin jasyratyn nemese resmı jumyspen qamtýdan jaltaratyn qaskóı tólemeıtinderge erekshe nazar aýdarylyp otyr.
Osylaısha, Rýdnyı qalasynyń turǵyny kámeletke tolmaǵan qyzyn asyraý úshin alıment tóleýden uzaq ýaqyt jaltarǵan. Sot aktisin oryndamaǵany úshin ákimshilik jaýaptylyqqa tartylǵanyna jáne qylmystyq jaýaptylyq týraly birneshe ret eskertýlerge qaramastan, 3,5 mıllıon teńge mólsherinde bereshegi bolǵan kezde ol jumyspen qamtý jáne qaryzdy óteý boıynsha sharalar qabyldamaǵan.
— Prokýratýranyń bastamasy boıynsha boryshkerge qatysty Qylmystyq kodekstiń 139-baby boıynsha sotqa deıingi tergep-tekserý bastaldy. Sot 2026 jylǵy 27 sáýirdegi úkimimen ol kináli dep tanylyp, bir jylǵa bas bostandyǵyn shekteýge sottaldy. Úkim zańdy kúshine endi, — delingen habarlamada.
Sonymen qatar, sot jazany óteý kezeńinde probatsııalyq baqylaý belgiledi, sonymen qatar oıyn-saýyq mekemelerine (dámhanalar, barlar, meıramhanalar, túngi klýbtar) jáne alkogoldik ishimdikterdi satatyn mamandandyrylǵan dúkenderge barýǵa tyıym saldy.
Jyl basynan beri prokýrorlyq qadaǵalaý aktileri boıynsha barlyǵy 200-den astam kámeletke tolmaǵandardyń quqyqtary qorǵalǵan. Alıment óndirý týraly sot aktilerin oryndamaǵany úshin 132 boryshker ákimshilik jaýaptylyqqa, 25 — qylmystyq jaýaptylyqqa tartyldy. 240 mıllıon teńgeden astam somaǵa alıment boıynsha bereshek óndirip alyndy.
Balalardyń quqyqtaryn qorǵaýdy qamtamasyz etý jáne alıment boıynsha bereshekti óndirý boıynsha jumys jalǵasady.
Buǵan deıin Pavlodar oblysynda alıment tólemeıtinderdi izdestirý jumystary kúsheıtilgenin jazdyq.
