Qostanaı oblysynda 207 mln teńgelik orman qory jerleri memleketke qaıtaryldy
ASTANA. KAZINFORM- Qostanaı oblysynyń Altynsarın aýdanynda jalpy kadastrlyq quny 207 mln teńge bolatyn orman qorynyń jer ýchaskeleri memleketke qaıtaryldy. Bul týraly oblystyq prokýratýranyń baspasóz qyzmeti habarlady.
Altynsarın aýdanynyń prokýratýrasy paıdalanylmaıtyn jerlerdi anyqtaý boıynsha jumys aıasynda orman zańnamasy talaptarynyń saqtalýyna taldaý júrgizdi.
Taldaý barysynda memlekettik orman qorynyń jekelegen ýchaskeleri uzaq ýaqyt boıy maqsaty boıynsha, onyń ishinde saýyqtyrý, rekreatsııalyq, týrıstik jáne sporttyq maqsattarda paıdalanylmaǵany anyqtaldy.
Ýchaskelerdiń biri orman paıdalanýshyǵa 2007 jyly berilgen. Alaıda ol is júzinde paıdalanylmaǵan. Bul atalǵan aýmaqta týrıstik ınfraqurylymdy damytýǵa kedergi keltirgen.
Prokýratýra qabyldaǵan sharalardyń nátıjesinde jer ýchaskeleri memleketke qaıtaryldy.
Bolashaqta olar ınvestorlarǵa týrıstik jobalardy júzege asyrý, ınfraqurylym qurý jáne aýmaqty damytý úshin usynylýy múmkin.
Prokýratýra paıdalanylmaı jatqan jerlerdi anyqtaý jáne olardy ekonomıkalyq aınalymǵa tartý boıynsha jumysyn jalǵastyryp jatyr.
Osyǵan deıin prokýratýranyń Kókshetaýda zańsyz berilgen 2,4 gektar jerdi qaıtarǵany týraly jazdyq.
