Qostanaı oblysynda 20 jyldan beri jóndeý kórmegen jol jańartyldy
ASTANA. KAZINFORM — Qostanaı oblysynda respýblıkalyq mańyzy bar KAZ-18 «Qostanaı-Mamlıýtka» avtojoly ortasha jóndeýden ótti, dep habarlaıdy «QazAvtoJol» UK baspasóz qyzmeti.
Respýblıkalyq mańyzy bar KAZ-18 «Qostanaı-Mamlıýtka» avtomobıl jolynyń Uzynkól aýylynan Troebratskoe aýylyna deıingi aralyǵyndaǵy jalpy uzyndyǵy 16,4 shaqyrymdy quraıtyn ýchaskesinde ortasha jóndeý jumystary aıaqtaldy.
Atalmysh ýchaske Qostanaı jáne Soltústik Qazaqstan oblystaryn baılanystyrady, sondaı-aq Presnogorkovka aýylyna burylys arqyly Reseı Federatsııasynyń aýmaǵyna shyǵýdy qamtamasyz etedi.
Kún saıyn KAZ-18 avtojolymen Troebratskoe, Sataı, Fedorovka, Úkiatqan, Sokol, Sibir, Presnogorkovka, Esmurza, Krýtoıarka, Volna, Beloglınka, Krasnyı Borok jáne Peschanka eldi mekenderdiń turǵyndary qatynaıdy.
Jalpy, jol aýdan halqynyń shamamen 34,5%-nyń, ıaǵnı 6 myńnan astam adamnyń kólik qajettilikterine qyzmet etedi.
— Jol 1978 jyly salynǵan, al bul ýchaskede sońǵy ret jóndeý jumystary 2006 jyly júrgizilgen. 40 jyldan astam paıdalanylǵan bul joldyń jabyny jaramsyz kúıge jetken, — delingen habarlamada.
Ortasha jóndeý aıasynda kelesi jumystar atqaryldy:
— jańa materıaldardy qosý arqyly qoldanystaǵy jabyn 25 sm tereńdikke deıin jonyldy;
— 6 sm qalyńdyqta asfaltbetonnyń tómengi qabaty tóseldi;
— asfaltbetonnyń joǵarǵy qabaty tóseldi, qalyńdyǵy 5 sm;
— jol jıekteri bekitildi;
— ýchaskeniń búkil uzyndyǵy boıynsha (16,4 shaqyrym) jol tańbalary syzyldy.
Jobany júzege asyrýǵa 28 jol-qurylys tehnıkasy jáne 30 maman jumyldyryldy. Júrgizilgen jóndeý jumystary avtojoldyń tehnıkalyq jaǵdaıyn edáýir jaqsartýǵa, jol qozǵalysy qaýipsizdiginiń deńgeıin arttyrýǵa jáne óńirler arasynda turaqty kólik qatynasyn qamtamasyz etýge múmkindik berdi.
Budan buryn Almatydaǵy Abaı dańǵyly Úlken Almaty aınalma avtomobıl jolyna deıin uzartylatyny belgili boldy.