Qostanaı oblysynda 17,4 mln teńgege medıtsınalyq jabdyq satyp alý kezinde zańbuzýshylyq anyqtaldy
ASTANA. KAZINFORM – Qostanaı oblysynyń Fedorov aýdanynda medıtsınalyq jabdyqtardy memlekettik satyp alý kezinde básekelestikti shekteý belgileri anyqtaldy.
Fedorov aýdanynyń prokýratýrasy aýdandyq aýrýhanada medıtsınalyq jabdyq satyp alýǵa bólingen bıýdjet qarajatynyń jumsalý zańdylyǵyna taldaý júrgizgen.
Tekserý barysynda satyp alynatyn jabdyqtardyń tehnıkalyq sıpattamalary naqty modelder men óndirýshilerge baǵyttalǵany belgili boldy. Qujattarda jabdyqtyń sıpattamalary tym egjeı-tegjeıli kórsetilip, basqa jetkizýshilerdiń satyp alýǵa qatysý múmkindigin shektegen.
– Bul Qazaqstan Respýblıkasynyń memlekettik satyp alý týraly zańnamasyna, adal básekelestik, ónim berýshilerdiń teńdigi jáne bıýdjet qarajatyn tıimdi paıdalaný qaǵıdattaryna qaıshy keledi, – delingen prokýratýra habarlamasynda.
Buǵan deıin júrgizilgen satyp alýlardy zerdeleý mundaı tájirıbeniń aýrýhanada buryn da qoldanylǵanyn kórsetken. Atap aıtqanda, gastrobeıoskoptar, sýarý sorǵylary, zerthanalyq mıkroskoptar, operatsııalyq ústelder, patsıent monıtorlary jáne basqa da medıtsınalyq buıymdardy satyp alý kezinde osyndaı jaǵdaılar anyqtalǵan.
Prokýratýra atalǵan tájirıbeniń júıeli sıpat alǵanyn eskerip, taldaý nátıjelerin Qostanaı oblysynyń barlyq aýmaǵynda júrgiziletin qadaǵalaý is-sharalarynda paıdalanýǵa jiberdi.
Aıta keteıik, ShQO-da janýarlardy qorǵaý mekemesinen 11,3 mln teńgeniń zańbuzýshylyǵy anyqtaldy.
