Qostanaı oblysynda 17 aýyl ishimdikten bas tartty

QOSTANAI. KAZINFORM – Qostanaı oblysynda alkogolge táýeldilikti azaıtýǵa, quqyq buzýdyń aldyn alýǵa jáne salaýatty mádenı ortany qalyptastyrýǵa baǵyttalǵan «Mádenı qoǵam» jobasy belsendi júzege asyrylyp jatyr. 

Jobanyń eń mańyzdy jetistikteriniń biri óńirdegi 17 aýyldyń alkogolden tolyq bas tartýy boldy. 

Bul aýyldar salaýatty ómir saltynyń úlgisin kórsetip, ózge eldi mekenderge baǵdar bolyp otyr.

Joba qoǵamdyq qoldaýmen iske asyrylyp jatyr. Qalalar men aýyldarda qurmetti aqsaqaldar, din ókilderi, belsendi azamattardan quralǵan qoǵamdyq komıssııalar jumys isteıdi. Olar alkogolge táýeldi jandarǵa kómektesip, rýhanı qoldaý kórsetip, túsindirý jumystaryn júrgizýde.

Sondaı-aq «Mádenı qoǵam» aıasynda ishimdik satatyn oryndarǵa reıdter uıymdastyrylady. Reıdke polıtsııa, eriktiler men BAQ ókilderi qatysady. Túngi ýaqytta nemese kámeletke tolmaǵandarǵa alkogol ónimin satý boıynsha bıyl jyl basynan beri 217 zań buzýshylyq anyqtalǵan.

Oblystyq PD bastyǵynyń orynbasary Amanjol Baızaqovtyń aıtýynsha, 7 aıda mas kúıinde jasalǵan qylmystar 3,3%-ǵa azaıǵan. Alaıda qoǵamdyq tártipti jıi buzatyn, otbasylyq janjal shyǵarýshylar men ishimdik ishýge áýes adamdardy baqylaý jumystary jalǵasýda.

Jyl basynan beri sot 2600 adamǵa alkogol tutynýǵa tyıym salý týraly sheshim shyǵarǵan, onyń ishinde úı jaǵdaıynda da.

«Mádenı qoǵam» jobasy Qostanaı oblysynda 2024 jylǵy qyrkúıekten bastap júzege asyrylýda. Jobanyń basty maqsaty — quqyq buzýshylyqtyń aldyn alý, zııandy ádettermen kúresý jáne salaýatty mádenı ortany damytý. 

Aıta ketelik Qostanaı oblysynyń turǵyndaryna jylýǵa jumsalǵan 106 mln teńge qaıtarylady.