Qostanaı oblysynda 16 jastaǵy jasóspirim iri kólemde sıntetıkalyq esirtkimen ustaldy

QOSTANAI. KAZINFORM — «Qarasora – 2025» jedel-profılaktıkalyq is-sharasy aıasynda Rýdnyı qalalyq PB esirtki qylmysyna qarsy is-qımyl bóliminiń qyzmetkerleri psıhotroptyq zattardy saqtap, taratty degen kúdikpen 16 jastaǵy Temirtaý turǵynyn ustady, dep habarlaıdy Polisia.kz.

Polıtsııanyń málimetinshe, jasóspirim Rýdnyıdaǵy qalalyq jaǵajaı mańynda qolǵa tústi. Odan untaq tárizdi zat salynǵan shamamen 80 oram tárkilendi. Keıin Qostanaı qalasynda jalǵa alynǵan páterge tintý júrgizilip, elektrondy tarazylar, júzdegen bos paket jáne satý úshin daıyndalǵan 200-den astam esirtki oramy anyqtaldy.

Tárkilengen zattyń jalpy salmaǵy shamamen jarty kılogramm boldy. Sot-hımııalyq saraptama onyń sıntetıkalyq esirtki ekenin kórsetti.

Aldyn ala derek boıynsha, jasóspirim áleýmettik jeliler arqyly qylmysqa tartylǵan: messendjerde oǵan «joǵary tabysy bar kýrerlik jumys» usynylyp, shyn máninde esirtkini saqtaý jáne Qostanaı oblysy aýmaǵyna «jasyryn qoıyp shyǵý» mindeti júktelgen.

Kúdiktige qatysty qylmystyq is qozǵaldy. Ol ýaqytsha ustaý ızolıatoryna qamaldy. Qazirgi ýaqytta polıtsııa qylmystyq toptyń uıymdastyrýshylaryn jáne sybaılastaryn izdestirýde.

Quqyq qorǵaýshylar jasóspirimderdi ınternet arqyly arbaý esirtki bıznesiniń keń taralǵan tásiline aınalǵanyn eske salyp, ata-analardy balalardyń bos ýaqytyn jáne áleýmettik jelidegi belsendiligin muqııat qadaǵalaýǵa shaqyrdy.

- Jalpy, búgingi tańda Qostanaı oblysynda zańsyz aınalymnan 5,5 keliden astam sıntetıkalyq esirtki tárkilengen, - delingen aqparatta.

Aıta keteıik, Qostanaı oblysynda mal sharýashylyǵyna bólingen 96 mln teńge sýbsıdııa qoldy boldy.