Qostanaı oblysynda 145 ónerkásiptik robot engizildi
ASTANA. KAZINFORM — 2025 jyly Qostanaı oblysynyń avtozaýyttarynda, taý-ken óndirý jáne mashına jasaý kásiporyndarynda 101 ónerkásiptik robot ornatyldy. Bul týraly Jasandy ıntellekt jáne tsıfrlyq damý mınıstrliginiń baspasóz qyzmeti habarlady.
Memleket basshysy 2026 jyldy Tsıfrlandyrý jáne jasandy ıntellekt jyly dep jarııalady.
Negizgi basymdyqtardyń qatarynda óńirlerdi tsıfrlandyrýdy damytý jáne «aqyldy qalalar» etalondyq standarttaryn engizý bar.
Qostanaı oblysy kásiporyndary tsıfrlyq sheshimder men avtomattandyrý elementterin belsendi túrde engizip jatyr. 2025 jyly óńirdiń avtozaýyttarynda, taý-ken óndirý jáne mashına jasaý kásiporyndarynda 101 ónerkásiptik robot ornatyldy.
Qazirgi tańda óndiristik úderisterde, buǵan deıin engizilgen sheshimderdi qosa alǵanda, 145 robottandyrylǵan júıe paıdalanylýda. Mundaı tehnologııalardy qoldaný óndiris tıimdiligin arttyrýǵa, tehnologııalyq úderisterdiń turaqtylyǵyn qamtamasyz etýge jáne ónim sapasyn jaqsartýǵa yqpal etedi.
— Búginde bizdiń mindetimiz — jekelegen tehnologııalardy engizýmen shektelmeı, Smart Region jáne tsıfrlyq ınfraqurylymdy damytýdyń júıeli tásilin qalyptastyrý. Tsıfrlyq transformatsııanyń naqty nátıjesin kórip otyrmyz — bul ónerkásiptegi úderisterdi avtomattandyrý, áleýmettik salada tsıfrlyq servısterdi damytý jáne basqarý tıimdiligin arttyrý úshin derekterdi paıdalaný. Negizgi nazar óńir ekonomıkasyna ólshenetin nátıje beretin jáne turǵyndardyń ómir sapasyn jaqsartatyn sheshimderge aýdarylady, — dep atap ótti Qostanaı oblysy ákimdigi ınformatızatsııa, memlekettik qyzmetter kórsetý jáne arhıvter basqarmasynyń basshysy Azamat Kashıev.
2025 jyldyń jazynda óńirde Qostanai Investment Forum ótti. Forým barysynda tsıfrlyq transformatsııa, jasandy ıntellektti qoldaný jáne joǵary tehnologııalyq jobalardy damytý máseleleri talqylandy. Qatysýshylar ınvestıtsııa tartý jáne oblys ekonomıkasyna zamanaýı tehnologııalyq sheshimderdi engizý múmkindikterin qarastyrdy.
Qazirgi ýaqytta óńirde agroónerkásip kesheninde, kólik ınfraqurylymynda jáne medıtsına salasynda tsıfrlyq sheshim engizilip jatyr.
Mundaı jobalar basqarý sapasyn arttyrýǵa jáne sheshim qabyldaý kezinde derekterdi keńinen paıdalanýǵa baǵyttalǵan. Kelesi kezeń — tabysty tsıfrlyq tájirıbelerdi aýqymdaý jáne ekonomıkanyń negizgi salalary men áleýmettik sektorǵa jasandy ıntellekt quraldaryn engizý.
Aıta ketelik Úndistan men Qazaqstan jasandy ıntellekt arqyly ınklıýzıvti ósimdi kúsheıtpek.