Qostanaı oblysynda 14,2 shaqyrymdyq sý burý kanaly salynyp jatyr
ASTANA. KAZINFORM- Qostanaı oblysynda kóktemgi sý tasqynyna daıyndyq aıasynda alty gıdrotehnıkalyq nysandy rekonstrýktsııalaý jáne jóndeý jumystary júrgizildi. Qarasý aýdanynda uzyndyǵy 14,2 shaqyrym bolatyn sý burý kanalynyń qurylysy jalǵasyp jatyr. Óńirdegi sý sharýashylyǵyn damytý jáne eldi mekenderdi sý basýdan qorǵaý máseleleri Sý resýrstary jáne ırrıgatsııa mınıstri Nurjan Nurjigitovtiń Qarabalyq aýdany turǵyndarymen kezdesýinde talqylandy.
Mınıstr jumys sapary aıasynda azamattarǵa vedomstvonyń óńirdegi sý salasyn damytý baǵytynda atqaryp jatqan jumystary týraly baıandady.
Jangeldın aýdanyndaǵy «Albarbóget» bógetin rekonstrýktsııalaý aıaqtaldy. Joba jaqyn mańdaǵy eldi mekenderdi sý basýdan qorǵaýǵa jáne mal sharýashylyǵyn jemshóppen qamtamasyz etýge baǵyttalǵan.
Sonymen qatar Sý sharýashylyǵy komıteti alty sý qoımasyn rekonstrýktsııalaý jobalaryn ázirlep jatyr. Olardyń qatarynda óńirdegi eń iri Joǵarǵy Tobyl jáne Qaratomar sý qoımalary bar.
Bul eki nysanda avtomattandyrylǵan baqylaýdyń pılottyq júıesi de engizilip jatyr. Qazaqstandaǵy BUU Damý baǵdarlamasynyń qoldaýymen júzege asyrylyp jatqan joba sý qoımalarynyń tehnıkalyq jaı-kúıin baqylaýǵa jáne sý tasqyny kezinde qajetti sharalardy ýaqtyly qabyldaýǵa baǵyttalǵan.
Eldi mekenderdi sý basýdan qorǵaý úshin tórt sý qoımasynda jergilikti habarlaý júıeleri ornatyldy. Budan bólek, jaqyn ýaqytta Tobyl, Shortandy jáne Torǵaı ózenderiniń jekelegen ýchaskelerin tazalaý josparlanyp otyr.
-Bizdiń maqsatymyz – sý tasqynynyń saldaryn joıýǵa ǵana emes, onyń aldyn alýǵa da baǵyttalǵan ornyqty júıe qalyptastyrý. Ol úshin bastalǵan jobalardy ýaqytyly aıaqtaý, gıdrotehnıkalyq qurylystardyń qaýipsizdigin turaqty baqylaý jáne árbir nysannyń tıisti deńgeıde paıdalanylýyn qamtamasyz etý mańyzdy. Bul jumystardyń túpki nátıjesi – eldi mekender men jergilikti turǵyndardyń qaýipsizdigin qamtamasyz etý, sondaı-aq óńirdiń sý sharýashylyǵy ınfraqurylymynyń senimdiligin arttyrý. Osy mindetterdi oryndaý úshin ortalyq jáne jergilikti atqarýshy organdardyń, basseındik sý ınspektsııasynyń, «Qazsýshar» RMK-nyń jáne sý paıdalanýshylardyń úılesimdi jumysy mańyzdy, – dedi Sý resýrstary jáne ırrıgatsııa mınıstri Nurjan Nurjigitov.
Kezdesý barysynda Qarabalyq aýdanynyń turǵyndary mınıstrge Toǵyzaq ózeniniń arnasyn tereńdetý, sý qorǵaý aımaqtaryn belgileý jáne sý qubyrlaryn rekonstrýktsııalaý máseleleri boıynsha suraqtar qoıdy.
Budan keıin Nurjan Nurjigitov azamattardy jeke qabyldap, jerasty sýyn ıgerý jáne sýarý maqsatynda paıdalaný, sondaı-aq arnaıy sý paıdalanýǵa ruqsat alý máseleleri boıynsha suraqtarǵa jaýap berdi. Kezdesý qorytyndysy boıynsha jaýapty komıtetter men departamentterdiń basshylaryna naqty tapsyrmalar berildi.
Osyǵan deıin sý tutyný esebi tsıfrlyq júıege kóshetini týraly jazdyq.
