Qostanaı oblysynda 13 áleýmettik kómek túri tsıfrlyq formatqa kóshirildi
ASTANA. KAZINFORM – QR Eńbek jáne halyqty áleýmettik qorǵaý vıtse-mınıstri Bahtııar Jazyqbaev Qostanaı oblysyna jumys sapary barysynda jumyspen qamtý jáne áleýmettik qorǵaý salasyna engizilip jatqan jańa tsıfrlyq sheshimderdi tanystyrdy, dep habarlaıdy Eńbek jáne halyqty áleýmettik qorǵaý mınıstrligi.
Halyqpen kezdesýde vıtse-mınıstr óńirdegi eńbek naryǵy, ataýly áleýmettik kómek alýshylardy jumyspen qamtý, óndiristegi qaýipsizdik jáne jalaqy bereshegi máselelerine toqtaldy.
Jańa quraldardyń biri – Enbek.kz platformasyndaǵy Tsıfrlyq jumyspen qamtý qyzmeti. Servıs kásibı baǵytty tańdaýdan, bos jumys oryndaryn izdeýden bastap oqytý men jumysqa ornalasýǵa deıingi protsesti bir júıege biriktiredi.
Jasandy ıntellekt negizindegi kómekshi azamattyń bilimi, eńbek ótili, tájirıbesi men daǵdylary týraly málimetterdi taldap, túıindemesin qalyptastyrýǵa nemese jańartýǵa kómektesedi. Sondaı-aq turǵylyqty jeri men eńbek mobıldigine daıyndyǵyn eskere otyryp, sáıkes bos jumys oryndaryn usynady.
Eger jumysqa ornalasý úshin qajetti quzyretter jetkiliksiz bolsa, júıe paıdalanýshyǵa Skills Enbek platformasynda tıisti oqýdan nemese qaıta daıarlaýdan ótýdi usynady.
– Jańa tásildiń basty erekshelikteriniń biri – proaktıvti jumys formatyna kóshý. ıAǵnı júıe azamat jumyspen qamtý qyzmetine ózi júgingenge deıin oǵan qajetti qoldaýdy usynýǵa baǵyttalǵan, – delingen mınıstrlik habarlamasynda.
Qazir Pavlodar oblysynda jasandy ıntellekt tehnologııalary qoldanylatyn Tsıfrlyq jumyspen qamtý qyzmetiniń pılottyq jobasy iske asyrylyp jatyr. Qolda bar derekter negizinde azamattarǵa bos jumys oryndary men kásiptik oqytý boıynsha usynystar avtomatty túrde qalyptastyrylady. Pılottyq joba nátıjesinde bul tásildi elimizdiń barlyq óńirine engizý kózdelgen.
Jańa júıede ár azamattyń biryńǵaı tsıfrlyq beıini men kásibı damý joly qalyptastyrylady. Memlekettik aqparattyq júıelerdi biriktirý arqyly adamnyń eńbek qyzmeti, bilimi, kásibı tájirıbesi men daǵdylary týraly málimetter bir júıege jınaqtalady.
Sonymen qatar Bahtııar Jazyqbaev jergilikti atqarýshy organdardyń áleýmettik kómek kórsetý sharalary boıynsha Biryńǵaı tsıfrlyq platformasyn tanystyrdy. Onda áleýmettik kómektiń 13 túrin rásimdeý protsesi avtomattandyrylǵan. Bul qujattar sanyn azaıtyp, óńirlik qoldaý sharalaryn alýdy jedeldetýge, olardyń ashyqtyǵy men ataýlylyǵyn arttyrýǵa múmkindik beredi.
– Tsıfrlyq servısterdi damytý jekelegen qyzmetterden azamattyń ómirlik jaǵdaıyn eskeretin jáne oǵan qajetti baǵytty kezeń-kezeńimen usynatyn biryńǵaı júıege kóshýge múmkindik berýi tıis. Kásibı damýdan jáne jumys izdeýden bastap áleýmettik qoldaý alýǵa deıingi barlyq qajetti sharalar bir júıege biriktiriledi, – dedi Bahtııar Jazyqbaev.
2026 jylǵy 1 shildedegi jaǵdaı boıynsha Qostanaı oblysynda 1 221 otbasy nemese 5 455 adam ataýly áleýmettik kómek alady. Olardyń arasynda eńbekke qabiletti 653 adam jumys istegenimen, otbasylarynyń tabysy áli de jetkiliksiz deńgeıde qalyp otyr.
Jyl basynan beri AÁK alatyn eńbekke qabiletti 233 adam jumyspen qamtýdyń belsendi sharalaryna tartylyp, onyń 175-i turaqty jumysqa ornalasty.
Vıtse-mınıstr jumyspen qamtý júıesiniń mindeti azamatqa tek jumys taýyp berýmen shektelmeıtinin atap ótti. Onyń biliktiligin arttyrýǵa, jalaqysy joǵary jumysqa aýysýyna jáne otbasynyń tabysyn kóbeıtýge jaǵdaı jasaý da mańyzdy.
Eńbek qaýipsizdigi máselesine de erekshe nazar aýdaryldy. 2026 jyldyń birinshi jartyjyldyǵynda Qostanaı oblysynyń kásiporyndarynda 56 adam zardap shegip, 11 jazataıym oqıǵa adam ólimimen aıaqtalǵan. Eńbek táýekelderi kartasynyń monıtorıngine óńirdegi 4,3 myńnan astam kásiporyn engizilip, onyń 52-sinde táýekel deńgeıi joǵary ekeni anyqtaldy.
Vıtse-mınıstr óndiristik jaraqattanýdyń aldyn alý jumystaryn kúsheıtip, jumys berýshiler, memlekettik organdar, kásipodaqtar men jumys berýshiler birlestikteriniń ózara is-qımylyn arttyrý qajettigin aıtty.
Óńirde jalaqy boıynsha bereshek te bar. 1 shildedegi jaǵdaı boıynsha úsh kásiporyn 27 jumyskerge jalpy somasy 12,7 mln teńge qaryz. Qazir berilgen nusqamalardyń oryndalýyn qamtamasyz etý jáne jumyskerlerdiń eńbek quqyqtaryn qalpyna keltirý jumystary júrgizilip jatyr.
Jumys sapary barysynda Bahtııar Jazyqbaev Qostanaı qalasyndaǵy №31 jalpy bilim beretin mektepke, Otbasyn qoldaý jáne belsendi uzaq ómir súrý ortalyǵyna, sondaı-aq Rýdnyı qalasynyń Mansap ortalyǵyna bardy.
Otbasyn qoldaý jáne belsendi uzaq ómir súrý ortalyǵynda vıtse-mınıstr ómirlik qıyn jaǵdaıǵa tap bolǵan otbasylarǵa áleýmettik, psıhologııalyq jáne quqyqtyq kómek kórsetý jumysymen tanysty. Ol otbasyndaǵy problemalardy erte anyqtap, jaǵdaı daǵdarysqa ulaspaı turyp áleýmettik súıemeldeýdi uıymdastyrýdyń mańyzyn atap ótti.
Rýdnyı qalasynyń Mansap ortalyǵynda azamattardy qabyldaý, bos jumys oryndaryn irikteý jáne jumyspen qamtýǵa járdemdesýdi qajet etetin adamdardy súıemeldeý jumystary tanystyryldy.
Vıtse-mınıstrdiń jeke qabyldaýynda turǵyndar jumyspen qamtý, áleýmettik qoldaý, zeınetaqy jáne áleýmettik qamsyzdandyrý, eńbek quqyqtaryn qorǵaý men áleýmettik qyzmetter alý máselelerin kóterdi. Qosymsha qaraýdy qajet etetin ótinishter boıynsha tıisti tapsyrmalar berildi.
Jumys saparynyń qorytyndysynda AÁK alýshylardyń eńbekke qabiletti bóliginiń tabysyn arttyrý, azamattardy turaqty jumysqa ornalasqanǵa deıin súıemeldeý, óndiristik jaraqattanýdyń aldyn alý jáne eńbek quqyqtaryn qorǵaý boıynsha birqatar mindet aıqyndaldy.
Aıta keteıik, elimizde 12 myń áleýmettik qyzmetker biliktiligin arttyrý kýrsynan ótti.
