Qostanaı oblysynda 110 oqýshy mekteptiń ornyna ákimdikke barady
ASTANA. KAZINFORM — Qostanaı oblysynyń Fedorov aýdanyndaǵy Keńaral mektebiniń 110 oqýshysy jańa oqý jylyn óz mektebiniń ǵımaratynda emes, basqa jerde bastaıdy. Buǵan mektepte áli de jalǵasyp jatqan kúrdeli jóndeý jumystary sebep, dep habarlaıdy Kazinform tilshisi.
Kenaral mektebine kúrdeli jóndeý jumystaryn «JılStroıServıs-98» merdiger kompanııasy júrgizip jatyr. Shart talaptaryna sáıkes, jóndeý jumystaryn 30 qazanǵa deıin aıaqtaý josparlanǵan.
Jóndeý aıaqtalǵanǵa deıin 110 oqýshy aýdan ákimdigi men Ýsakov orman sharýashylyǵynyń ǵımaratyna ýaqytsha ornalastyrylady. Oqý protsesi eki aýysymda uıymdastyrylady.
Mektep ǵımaratynda áli terezelerdi ornatý, shatyrdy jóndeý, jylytý júıesin retke keltirý, esikterdi ornatý, ishki árleý jáne eden jabyndysyn tóseý jumystary júrgizilýi tıis.
Jalpy 2026 jyly Qostanaı oblysyndaǵy 113 bilim berý nysanyn jóndeýge 5,4 mlrd teńge bólindi. Onyń 2,2 mlrd teńgesi jeti nysandy kúrdeli jóndeýge, taǵy 3,2 mlrd teńgesi 106 nysandy aǵymdaǵy jóndeýge baǵyttalǵan.
Qazirgi ýaqytta tórt nysandaǵy kúrdeli jóndeý jumystary tolyq aıaqtaldy.
Buǵan deıin habarlanǵandaı, Qostanaı oblysynda 6 mektep ashanasyna sanıtarlyq qorytyndy nege berilmegeni belgili boldy.
