Qostanaı oblysynda 1 gıgavattyq jel elektr stantsııasy salynady
QOSTANAI. KAZINFORM — Qostanaıda QR Energetıka vıtse-mınıstri Qudaıbergen Arymbektiń Qostanaı oblysy turǵyndarymen kezdesýi ótti. Ashyq dıalog barysynda ol energetıka salasyndaǵy memlekettik saıasattyń basym baǵyttary, energetıkalyq qaýipsizdikti qamtamasyz etý sharalary, ınfraqurylymdy jańǵyrtý jáne jańartylatyn energııa kózderin damytý týraly aıtyp ótti.

Kezdesý barysynda óńirde júzege asyrylyp jatqan jáne josparlanǵan jobalarǵa erekshe nazar aýdaryldy. Atap aıtqanda, Qostanaı oblysynda gazdandyrý jumystary jalǵasýda – búgingi tańda óńirdiń gazdandyrý deńgeıi shamamen 60%-dy quraıdy. 2025 jyly tórt jobany iske asyrýǵa 3,1 mlrd teńge qarastyrylǵan. Bul shamamen 5,7 myń adamdy qosymsha tabıǵı gazben qamtýǵa múmkindik beredi. Sonymen qatar, Qostanaı, Rýdnyı jáne Arqalyq qalalarynda jylý jáne elektr jelilerin qaıta jańǵyrtý jumystary júrgizilip jatyr.
Sonymen qatar, óńirde jańartylatyn energııa kózderin damytý qolǵa alynǵan. Aýktsıondyq saýda-sattyq nátıjesi boıynsha jalpy qýaty 250 MVt bolatyn tórt joba júzege asyrylady. Budan bólek, qýattylyǵy 1 GVt bolatyn jáne energııany jınaqtaý júıesimen jabdyqtalǵan jel elektr stantsııasyn salý jobasy tańdaldy. Joba 2028 jyly iske qosylady dep josparlanǵan.
Turǵyndar kezdesý barysynda belsendilik tanytyp, gaz jáne jylýmen qamtý, jelilerdi jóndeý jáne ózge de mańyzdy máseleler boıynsha suraqtar qoıdy. Vıtse-mınıstr barlyq saýaldarǵa naqty jaýaptar men túsindirmeler berdi.
Aıta keteıik, buǵan deıin Jambyl oblysynda qýaty 1 GVt jel elektr stantsııasy salynatyny habarlanǵan bolatyn.